ବିନେଶଙ୍କ ପରେ ଓଜନ ବୃଦ୍ଧିର ଶିକାର ହୋଇଥିଲେ ଅମନ, ୧୦ ଘଣ୍ଟାରେ କମାଇଲେ ୪.୬ କିଲୋଗ୍ରାମ

ସମାଜ ଡିଜିଟାଲ ଡେସ୍କ: ମହିଳା କୁସ୍ତିର ୫୦ କିଲୋଗ୍ରାମ ବର୍ଗରେ ବିନେଶ ଫୋଗଟ ଫାଇନାଲ ମ୍ୟାଚ ଖେଳିବା ପୂର୍ବରୁ ଅଯୋଗ୍ୟ ଘୋଷିତ ହୋଇଥିଲେ। କାରଣ ଥିବା ଓଜନ ବୃଦ୍ଧି। ୧୦୦ ଗ୍ରାମ ଓଜନ ଅଧିକ ହେବାରୁ ତାଙ୍କୁ ପ୍ୟାରିସ ଅଲିମ୍ପିକ୍ସରୁ ବାହାରିବାକୁ ପଡ଼ିଥିଲା। ଏବେ ଆଉ ଏକ ତଥ୍ୟ ସାମ୍ନାକୁ ଆସିଛି। ଭାରତକୁ କୁସ୍ତିରେ ପ୍ରଥମ ପଦକ ଦେଇଥିବା ଅମନ ଶେରାଓ୍ବତ ମଧ୍ୟ ଅନୁରୂପ ସମସ୍ୟାର  ସମ୍ମୁଖୀନ ହୋଇଥିଲେ। ହେଲେ ବିନେଶଙ୍କଠାରୁ ମିଳିଥିବା ଶିକ୍ଷା ତାଙ୍କୁ ପଦକ ଦେବାରେ ସହଯୋଗ କରିଥିଲା।

ଘଟଣାଟି ଏମିତି। ଅମନ ଗତ ଶୁକ୍ରବାର କୁସ୍ତିରେ ଭାରତ ପାଇଁ କାଂସ୍ୟ ପଦକ ଜିତିଛନ୍ତି। ଏହା ପୂର୍ବରୁ ସେ ସେମିଫାଇନାଲରେ ଜାପାନର କୁସ୍ତିଯୋଦ୍ଧାଙ୍କଠାରୁ ପରାଜିତ ହୋଇଥିଲେ। କିନ୍ତୁ ବ୍ରୋଞ୍ଜ ପଦକ ପାଇଁ ତାଙ୍କୁ ଲଢ଼ିବାର ଥିଲା। ହେଲେ ସେମିଫାଇନାଲରେ ହାରିବା ପରେ ତାଙ୍କ ଓଜନ ହଠାତ ବଢ଼ିଯାଇଥିଲା। ସେ ୫୮ କିଲୋଗ୍ରାମ ବର୍ଗରେ ଅଂଶଗ୍ରହଣ କରିଥିବା ବେଳେ ତାଙ୍କ ଓଜନ ୬୧.୫ କିଲୋଗ୍ରାମ ହୋଇଯାଇଥିଲା। କିନ୍ତୁ ପ୍ରାୟ ୧୦ ଘଣ୍ଟା ଧରି ପ୍ରଶିକ୍ଷକଙ୍କ ତତ୍ଵାବଧାନରେ ନିରବଚ୍ଛିନ୍ନ ପ୍ରୟାସ କରି ଶେଷରେ ନିଜ ଓଜନ ୪.୬ କିଲୋଗ୍ରାମ ହ୍ରାସ କରିବାରେ ସଫଳ ହୋଇଥିଲେ। ଯେଉଁଥିପାଇଁ ସେ ବ୍ରୋଞ୍ଜ ପଦକ ଲାଗି ଅଂଶଗ୍ରହଣ କରିପାରିଥିଲେ। ନଚେତ୍‌ ଏହି ପଦକଟି ବି ହାତଛଡ଼ା ହୋଇଯିବାର ଆଶଙ୍କା ଉପୁଜିଥିଲା।