ନୂଆଦିଲ୍ଲୀ: କରୋନା ମୁକାବିଲା ପାଇଁ ଦେଶବ୍ୟାପୀ ଫେବୃଆରୀ ୨୪ରୁ ଜାରି ତାଲାବନ୍ଦ ଅବ୍ୟାହତ ରହିଥିବାବେଳେ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ୫୯,୬୨୨ରେ ପହଞ୍ଚିଛି। ଶନିବାର ସ୍ବାସ୍ଥ୍ୟ ମନ୍ତ୍ରଣାଳୟରୁ ମିଳିଥିବା ତଥ୍ୟ ଅନୁସାରେ ଗତ ୨୪ ଘଣ୍ଟା ମଧ୍ୟରେ ୩,୩୨୦ ଜଣ ନୂଆ ସଂକ୍ରମିତ ଚିହ୍ନଟ ହୋଇଥିବା ବେଳେ ୯୫ ଜଣ ରୋଗୀଙ୍କ ମୃତ୍ୟୁ ଘଟିଛି। ତେବେ ଦେଶରେ ଆରୋଗ୍ୟ ହାର ୨୯.୯୧% ରହିଛି। ଇତିମଧ୍ୟରେ ୧୭,୮୪୭ କୋଭିଡ-୧୯ ସଂକ୍ରମିତ ବ୍ୟକ୍ତି ଆରୋଗ୍ୟ ଲାଭ କରିଛନ୍ତି। ଏବେ ସୁଦ୍ଧା ୩୯,୮୩୪ ଜଣ ସଂକ୍ରମିତଙ୍କ ଚିକିତ୍ସା ଚାଲିଛି।
ଅନ୍ୟ ଏକ ତଥ୍ୟ ଅନୁସାରେ, ତାଲାବନ୍ଦ ଅବଧି ମଧ୍ୟରେ ଦେଶରେ ଦୁର୍ଘଟଣା ଓ ମାନସିକ ଅବସାଦରେ ବହୁ ଲୋକ ପ୍ରାଣ ହରାଇଲେଣି। ମଇ ୮ ସୁଦ୍ଧା ଏମାନଙ୍କ ସଂଖ୍ୟା ୩୭୦ରୁ ଅଧିକ ବୋଲି ଆକଳନ କରାଯାଇଛି। ଏମାନଙ୍କ ମଧ୍ୟରେ ଅଧିକାଂଶ ପ୍ରବାସୀ ଶ୍ରମିକ ଓ ସମାଜର ନିମ୍ନ ବର୍ଗର ବ୍ୟକ୍ତି ରହିଥିବା ପ୍ରକାଶ। ଶୁକ୍ରବାର ଭୋର୍ ସମୟରେ ଔରଙ୍ଗାବାଦରେ ୧୬ଶ୍ରମିକଙ୍କ ଉପରେ ଟ୍ରେନ୍ ମାଡ଼ିଯାଇଥିଲା। ଏହା ପୂର୍ବରୁ ପ୍ରାୟ ୪୨ ଶ୍ରମିକ ଦୁର୍ଘଟଣାରେ ପ୍ରାଣ ହରାଇଥିଲେ। ମୃତକଙ୍କ ମଧ୍ୟରୁ ୭୩ ଜଣ ମାନସିକ ଅବସାଦ ଯୋଗୁଁ ଏବଂ ଆଉ କିଛି କରୋନାରେ ଆକ୍ରାନ୍ତ ହେବା ଭୟରେ ଆତ୍ମହତ୍ୟା କରିଛନ୍ତି। ସେହିପରି ମଦ ପାଇଁ ୪୫ ଜଣଙ୍କ ମୃତ୍ୟୁ ହୋଇଥିବାବେଳେ ଖାଦ୍ୟାଭାବ ଓ ଅର୍ଥାଭାବରୁ ୩୪ ଜଣଙ୍କ ମୃତ୍ୟୁ ହୋଇଥିବା ରିପୋର୍ଟରେ ଦର୍ଶାଯାଇଛି। ସାମାଜିକ କର୍ମୀ ତଥା ଗବେଷିକା କନିକା ଶର୍ମା, ଜିନ୍ଦଲ ଗ୍ଲୋବାଲ ସ୍କୁଲ ଅଫ ଲ’ର ସହକାରୀ ପ୍ରାଧ୍ୟାପକ ଅମନ ଓ ପବ୍ଲିକ ଇେଣ୍ଟ୍ରଷ୍ଟ ଟେକ୍ନୋଲଜିଷ୍ଟ ତେଜଶ ଜି.ଏନ ପ୍ରମୁଖଙ୍କ ଦ୍ବାରା ବିଭିନ୍ନ ଗଣମାଧ୍ୟମ ରିପୋର୍ଟ ଆଧାରରେ ପ୍ରସ୍ତୁତ ରିପୋର୍ଟ ଅନୁଯାୟୀ, ମାର୍ଚ୍ଚ ୧୯ରୁ ମଇ ୮ ମଧ୍ୟରେ ୩୭୦ ଜଣଙ୍କର ମୃତ୍ୟୁ ଘଟିଛି। ଏହି ସଂଖ୍ୟା ଅଧିକ ମଧ୍ୟ ହୋଇପାରେ ବୋଲି ରିପୋର୍ଟରେ କୁହାଯାଇଛି।
