ତିରୁଅନନ୍ତପୁରମ : ଇଂଲଣ୍ଡ ‘ଏ’ ଏଠାରେ ଗୁରୁବାର ଖେଳାଯାଇଥିବା ପଞ୍ଚମ ତଥା ଅନ୍ତିମ ବେସରକାରୀ ଦିନିକିଆ କ୍ରିକେଟ ମ୍ୟାଚରେ ଘରୋଇ ଭାରତ ‘ଏ’କୁ ୧ ୱିକେଟରେ ପରାସ୍ତ କରିଛି। ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିବା ଭାରତ ‘ଏ’ ୧୨୧ ରନରେ ଅଲଆଉଟ ହୋଇଥିଲା। ଜବାବରେ ଇଂଲଣ୍ଡ ‘ଏ’ ୯ ୱିକେଟ ବିନିମିୟରେ ୧୨୫ ରନ କରି ବିଜୟୀ ହୋଇଥିଲା। ପରାଜୟ ସତ୍ତ୍ବେ ଭାରତ ‘ଏ’ ପାଞ୍ଚଟିକିଆ ସିରିଜକୁ ୪-୧ରେ ହାତେଇ ନେଇଛି।
ଭାରତ ‘ଏ’ ଅଧିନାୟକ ଅଙ୍କିତ ବାୱାନେ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ। ସିଦ୍ଧେଶ ଲାଡ୍ ୩୬, ଅକ୍ଷର ପଟେଲ ୨୩ ଓ ଦୀପକ ଚହର ୨୧ ରନ କରିଥିବାବେଳେ ଦଳର ଅନ୍ୟ କୌଣସି ବ୍ୟାଟସମ୍ୟାନ ଦୁଇ ଅଙ୍କ ବିଶିଷ୍ଟ ସ୍କୋର କରିପାରିନଥିଲେ। ଫଳରେ ଭାରତ ‘ଏ’ ୩୫ ଓଭରରେ ୧୨୧ ରନରେ ଅଲଆଉଟ ହୋଇଥିଲା। ଇଂଲଣ୍ଡ ‘ଏ’ ପକ୍ଷରୁ ଜ୍ୟାକ୍ ଓଭରଟନ୍ ୩ଟି ଓ ଟମ୍ ବେଲି ୨ଟି ୱିକେଟ ନେଇଥିବା ବେଳେ ଲୁଇସ ଗ୍ରେଗୋରି, ମାଥ୍ୟୁ କାର୍ଟର ଓ ଷ୍ଟିଭେନ ମୁଲାନି ପ୍ରତ୍ୟେକ ଗୋଟିଏ ୱିକେଟ ପାଇଥିଲେ। ଜବାବରେ ଇଂଲଣ୍ଡ ‘ଏ’ ୩୦.୩ ଓଭରରେ ୯ ୱିକେଟ ବିନିମୟରେ ୧୨୫ ରନ କରି ବିଜୟୀ ହୋଇଥିଲା। ବେନ୍ ଡକେଟ୍ ସର୍ବାଧିକ ୭୦ (ଅପରାଜିତ) ରନ କରିଥିଲେ। ଭାରତ ‘ଏ’ ପକ୍ଷରୁ ଦୀପକ ଚହର ଓ ରାହୁଲ ଚହର ୩ଟି ଲେଖାଏଁ ୱିକେଟ ନେଇଥିବା ବେଳେ ଅକ୍ଷର ପଟେଲଙ୍କୁ ୨ଟି ୱିକେଟ ମିଳିଥିଲା।
୫ମ ଦିନିକିଆରେ ଇଂଲଣ୍ଡ ‘ଏ’ ବିଜୟୀ ; ଭାରତ ‘ଏ’ ୪-୧ରେ ସିରିଜ ଜିତିଲା
Popular Categories
Previous article
Next article