ଡେସ୍କ: ପାକିସ୍ତାନର ପୂର୍ବତନ ବୈଦେଶିକ ମନ୍ତ୍ରୀ ହିନା ରବ୍ବାନୀ ଖାର ଇମ୍ରାନ ଖାନଙ୍କୁ ‘ଲୋକପ୍ରିୟତାର ପୋଷ୍ଟର ବୟ’ ବୋଲି ଅଭିହିତ କରି କହିଛନ୍ତି ଯେ ଜେଲରେ ଥିବା ପୂର୍ବତନ ପ୍ରଧାନମନ୍ତ୍ରୀ ଦେଶର ଜନସାଧାରଣଙ୍କୁ ‘ଅନ୍ୟାୟ’ ବିରୋଧରେ ଏକାଠି କରିବାରେ ସକ୍ଷମ ହୋଇଥିଲେ, କିନ୍ତୁ କ୍ଷମତାରେ ଥିବା ସମୟରେ ସେମାନଙ୍କୁ ‘ବାଟ ଦେଖାଇ ଦେବା’ ପାଇଁ ତାଙ୍କର କୌଣସି ଯୋଜନା ନଥିଲା।
ଜର୍ମାନୀର ମ୍ୟୁନିକ୍ ସିକ୍ୟୁରିଟି କନଫରେନ୍ସ ଅବସରରେ ଏକ ଡିଜିଟାଲ ମିଡିଆ କମ୍ପାନି ସହ କଥାବାର୍ତ୍ତା ବେଳେ ୪୬ ବର୍ଷୀୟ ପାକିସ୍ତାନ ପିପୁଲ୍ସ ପାର୍ଟି (ପିପିପି) ନେତା ଏଭଳି ମନ୍ତବ୍ୟ ଦେଇଛନ୍ତି। ସେ କହିଛନ୍ତି, ୭୧ ବର୍ଷୀୟ ପାକିସ୍ତାନ ତେହରିକ-ଏ-ଇନସାଫ (ପିଟିଆଇ) ଦଳର ପ୍ରତିଷ୍ଠାତା ଖାନ୍ ସମସ୍ତଙ୍କୁ ସବୁ କିଛି ଭୁଲ୍ ଓ ବଡ଼ ଅନ୍ୟାୟ ବିଷୟରେ ଏକାଠି କରିବାରେ ସକ୍ଷମ ହୋଇଛନ୍ତି। କିନ୍ତୁ କ୍ଷମତାକୁ ଆସିଲେ ସେମାନଙ୍କୁ ସମାଧାନର ବାଟ ଦେବା ପାଇଁ ତାଙ୍କ ପାଖରେ କୌଣସି ଯୋଜନା ନାହିଁ। ଏପରିକି ଯେତେବେଳେ ସେମାନେ ସରକାରରେ ଥାଆନ୍ତି, ସେମାନେ ବିରୋଧୀଙ୍କ ଭଳି କାର୍ଯ୍ୟ କରନ୍ତି ବୋଲି ୨୦୨୨ ଏପ୍ରିଲରୁ ଗତ ୨୦୨୩ ଅଗଷ୍ଟ ପର୍ଯ୍ୟନ୍ତ ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ୱ ତୁଲାଇଥିବା ଖାର ରିପୋର୍ଟରେ କହିଛନ୍ତି।
ପାକିସ୍ତାନ ମୁସଲିମ୍ ଲିଗ୍-ନୱାଜ (ପିଏମ୍ଏଲ୍-ଏନ୍) ଏବଂ ପିପିପି ସହିତ ଇମ୍ରାନଙ୍କ ପିଟିଆଇ ପାର୍ଟିର ରାଜନୈତିକ ପ୍ରତିଦ୍ୱନ୍ଦ୍ୱିତା ବିଷୟରେ ଉଲ୍ଲେଖ କରି ଖାର କହିଛନ୍ତି ଯେ ନୂଆ ମେଣ୍ଟ ସରକାର ଗଠନ ପାଇଁ କ୍ଷମତା ବଣ୍ଟନ ଚୁକ୍ତି ଉପରେ ସହମତି ପ୍ରକାଶ କରି ଖାର କହିଛନ୍ତି ଯେ ‘ପୁନର୍ଗଠନ’ ଅପେକ୍ଷା ‘ସମନ୍ୱୟ’ ବହୁତ ଭଲ।
ଫେବ୍ରୁଆରି ୮ରେ ହୋଇଥିବା ନିର୍ବାଚନ ଫଳାଫଳ ପରେ ତୀବ୍ର ଆଲୋଚନା ପରେ ପିପିପି ଅଧ୍ୟକ୍ଷ ବିଲାୱଲ ଭୁଟ୍ଟୋ-ଜର୍ଦାରୀ ମଙ୍ଗଳବାର ବିଳମ୍ବିତ ରାତିରେ ଘୋଷଣା କରିଛନ୍ତି ଯେ ପିଏମଏଲ-ଏନ ଅଧ୍ୟକ୍ଷ ଶେହବାଜ ସରିଫ (୭୨) ପୁଣି ଥରେ ପ୍ରଧାନମନ୍ତ୍ରୀ ଦାୟିତ୍ୱ ଗ୍ରହଣ କରିବେ। ସେହିପରି ପିପିପିର ଉପାଧ୍ୟକ୍ଷ ଆସିଫ୍ ଅଲ୍ଲୀ ଜର୍ଦାରୀ (୬୮) ରାଷ୍ଟ୍ରପତି ପଦ ପାଇଁ ମିଳିତ ପ୍ରାର୍ଥୀ ହେବେ। ଖାର କହିଛନ୍ତି, ମୁଁ ଆଶା କରୁଛି ଯେ ଏହା ଆମର ସମୟ ହେବ ଯେଉଁଠାରେ ଆମେ ଏକାଠି ହୋଇ ଅନୁଭବ କରିବୁ ଯେ ପୁନରୁଦ୍ଧାରଠାରୁ ସମନ୍ୱୟ ବହୁତ ଭଲ।
