ଭୁବନେଶ୍ୱର : ଓଡ଼ିଶା ସମ୍ପର୍କରେ ଅଭିଜିତ ଆୟାର ରଖିଥିବା ବିବାଦୀୟ ମନ୍ତବ୍ୟର ତର୍ଜମା ନେଇ ଶନିବାର ତାଙ୍କ ବିରୋଧରେ ସ୍ୱାଧିକାର ପ୍ରସଙ୍ଗର ତଦନ୍ତ ପାଇଁ ଗଠନ କରାଯାଇଥିବା ବିଧାନସଭା ଗୃହ କମିଟିର ପ୍ରଥମ ବୈଠକ ଡକାଯାଇଛି। ଅପରାହ୍ଣରେ ବିରୋଧୀ ଦଳ ନେତା ନରସିଂହ ମିଶ୍ରଙ୍କ ଅଧ୍ୟକ୍ଷତାରେ ବସୁଥିବା ଏହି ବୈଠକରେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ସମେତ ଓଡ଼ିଶାର କଳା, ଭାସ୍କର୍ଯ୍ୟ, ଐତିହ୍ୟ, ସମ୍ମାନ, ବିଧାନସଭା ସଦସ୍ୟ ଏବଂ ସାମ୍ବାଦିକଙ୍କ ପ୍ରତି ଅଭିଜିତଙ୍କ ଅରୁଚିକର ମନ୍ତବ୍ୟ ଉପରେ କମିଟି ସଦସ୍ୟମାନେ ପୁଙ୍ଖାନୁପୁଙ୍ଖ ଆଲୋଚନା କରିବେ।
ଶ୍ରୀ ଆୟାରଙ୍କ ମନ୍ତବ୍ୟକୁ ନେଇ ବିରୋଧୀ ଦଳ ନେତା ନରସିଂହ ମିଶ୍ର ଗୁରୁବାର ବିଧାନସଭାରେ ସ୍ୱାଧିକାର ଭଙ୍ଗ ନୋଟିସ ଆଣିଥିଲେ। ସର୍ବସମ୍ମତି କ୍ରମେ ଏହା ଗୃହୀତ ହୋଇଥିଲା।
ଘଟଣାର ତଦନ୍ତ ପାଇଁ ୬ଜଣ ସଦସ୍ୟ ବିଶିଷ୍ଟ ଗୃହ କମିଟି ଗଠନ କରାଯାଇଥିଲା। ବିରୋଧୀ ଦଳ ନେତା ଏହାର ଅଧ୍ୟକ୍ଷ ଥିବା ବେଳେ ବିଜେପି ବିଧାୟକ ଦଳ ନେତା କନକବର୍ଦ୍ଧନ ସିଂହଦେଓ, ବିଧାୟକ ଦେବୀ ପ୍ରସାଦ ମିଶ୍ର, ଅରୁଣକୁମାର ସାହୁ, ସଞ୍ଜୟ ଦାସବର୍ମା ଓ ପ୍ରମିଳା ମଲ୍ଲିକ ସଦସ୍ୟ ଅଛନ୍ତି।
ସୂଚନାଯୋଗ୍ୟ ଯେ ମୌସୁମୀ ଅଧିବେଶନର ଶେଷ ଦିନ ଅଭିଜିତ ଆୟାରଙ୍କ ଅରୁଚିକର ମନ୍ତବ୍ୟ ଓ ଟୁଇଟକୁ ନେଇ ବିଧାନସଭାରେ ଦଳମତ ନିର୍ବିଶେଷରେ ବିଧାୟକମାନେ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ। ବୈଜୟନ୍ତ ପଣ୍ଡାଙ୍କ ବନ୍ଧୁ ଅଭିଜିତଙ୍କୁ ସମନ କରାଯିବା ଏବଂ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରିଥିଲେ।
ଅଭିଜିତଙ୍କ ବିରୋଧରେ ବିରୋଧୀ ଦଳ ନେତା ଆଣିଥିବା ସ୍ୱାଧିକାର ଭଙ୍ଗ ନୋଟିସ ଉପରେ ଆଲୋଚନା ପାଇଁ ପ୍ରଶ୍ନକାଳ ବାତିଲ କରାଯାଇଥିଲା।
