ନୂଆଦିଲ୍ଲୀ: ହିମାଚଳରେ କଂଗ୍ରେସକୁ ଲାଗିଛି ବଡ ଝଟକା । ରାଜ୍ୟସଭା ନିର୍ବାଚନରେ ହିମାଚଳ ପ୍ରଦେଶର ଗୋଟିଏ ଆସନରେ ବିଜେପି ପ୍ରାର୍ଥୀ ହର୍ଷ ମହାଜନ ବିଜୟ ହୋଇଛନ୍ତି । ଏଠାରେ ଶାସକ ଦଳର ପ୍ରାର୍ଥୀ ଅଭିଷେକ ମନୁ ସିଂଭି କ୍ରସ୍ ଭୋଟିଂ ଯୋଗୁ ପରାଜିତ ହୋଇଛନ୍ତି । ହିମାଚଳରେ ବିଜେପିର ସଂଖ୍ୟାଗରିଷ୍ଠତା ନଥିଲା, ହେଲେ କଂଗ୍ରେସ ବିଧାୟକଙ୍କ କ୍ରସ ଭୋଟିଂ ଏବଂ ତିନିଜଣ ସ୍ୱାଧୀନ ବିଧାୟକ ମଧ୍ୟ କଂଗ୍ରେସକୁ ସମର୍ଥନ କରିନଥିଲେ । ଯେଉଁଥିପାଇଁ ଉଭୟ କଂଗ୍ରେସ ଓ ବିଜେପି ପ୍ରାର୍ଥୀ ସମାନ ଭୋଟ ପାଇଥିଲେ । ପ୍ରଥମ ଥର ପାଇଁ ରାଜ୍ୟସଭା ନିର୍ବାଚନରେ ଦୁଇ ପ୍ରାର୍ଥୀଙ୍କ ମଧ୍ୟରେ ସମାନ ସଂଖ୍ୟକ ଭୋଟ୍ ପଡିବାରୁ ଉଭୟଙ୍କୁ ଏକ ଭୋଟ ସ୍ଲିପ୍ ଦେବାକୁ ନିଷ୍ପତି ନିଆଯାଇଥିଲା । ତେବେ ଏହି ସ୍ଲିପ୍ ମଧ୍ୟ କଂଗ୍ରେସର ସାତ ଦେଇନଥିଲା ଫଳରେ ବିଜେପି ବାଜିମାତ କରିଥିଲା ।
ବୁଧବାର ହିମାଚଳ ବିଧାନସଭାରେ ବଜେଟ ଉପସ୍ଥାପନ କରାଯିବ । ହେଲେ ଏହା ପୂର୍ବରୁ ଶାସକ ଦଳ ବହୁମତ ସାବ୍ୟସ୍ତ କରୁ ବୋଲି ଦାବି କରିବା ସହ ବିଜେପି ସକାଳୁ ସକାଳୁ ରାଜଭବନରେ ପହଂଚି ରାଜ୍ୟପାଳଙ୍କୁ ଭେଟିଛନ୍ତି । ରାଜ୍ୟସଭା ନିର୍ବାଚନରେ କ୍ରସ୍ ଭୋଟିଂ ଯୋଗୁ ମୁଖ୍ୟମନ୍ତ୍ରୀ ସୁଖବିନ୍ଦର ସିଂହ ସୁଖୁଙ୍କ ଉପରେ ରାଜ୍ୟର ବିଧାୟକଙ୍କ ବିଶ୍ୱାସ ନଥିବା ବିଜେପି କହିଛି । କଂଗ୍ରେସ ସରକାର ନିଜର ବିଧାୟକଙ୍କ ବିଶ୍ୱାସ ହରାଇବା ସହ ସଂଖ୍ୟାଗରିଷ୍ଠତା ହରାଇଥିବା ଦାବି କରିଛି ବିରୋଧୀ ବିଜେପି ।
ହିମାଚଳରେ ମୋଟ ୬୮ଟି ସଦସ୍ୟ ବିଶିଷ୍ଟ ବିଧାନସଭା ଆସନରେ ୪୦ଜଣ ବିଧାୟକ ଅଛନ୍ତି । ବିଜେପିର ୨୫ଜଣ ଏବଂ ଅନ୍ୟ ତିନି ଜଣ ସ୍ୱାଧୀନ । କୌଣସି ଦଳ ସଂଖ୍ୟାଗରିଷ୍ଠତା ହାସଲ ପାଇଁ ମାତ୍ର ୩୫ଟି ସିଟ୍ ଆବଶ୍ୟକ । କଂଗ୍ରେସ ସରକାର ବଂଚାଇବାକୁ ଜୋରଦାର ପ୍ରୟାସ ଆରମ୍ଭ କରିଛି । ଦଳ ପରିସ୍ଥିତିକୁ ଅନୁଧ୍ୟାନ କରିବା ସହ କର୍ଣ୍ଣାଟକର ଉପମୁଖ୍ୟମନ୍ତ୍ରୀର ଡି.କେ ଶିବକୁମାରକୁ ହିମାଚଳ ପର୍ଯ୍ୟବେକ୍ଷକ ଭାବରେ ନିଯୁକ୍ତ କରିଛି । ଶିବକୁମାରକୁ ଆଜି ବେଙ୍ଗାଲୁରୁରୁ ଚଣ୍ଡିଗଡ ଯାତ୍ରା କରିବେ ଏବଂ ପରେ ହିମାଚଳ ପ୍ରଦେଶ ପହଂଚିବେ । ଭୁପେନ୍ଦ୍ର ସିଂହ ହୁଡାଙ୍କୁ ମଧ୍ୟ ହିମାଚଳ ପଠାଯାଇପାରେ ବୋଲି ସୂଚନା ମିଳିଛି ।
