ହରଭଙ୍ଗା: ଜଳବାୟୁ ପରିବର୍ତ୍ତନ ଯୋଗୁ ଅସମୟରେ ବର୍ଷା ସାଙ୍ଗକୁ ବିଜୁଳି ଘଡ଼ଘଡ଼ି ମାରି ଅନେକ ଧନଜୀବନ ହାନୀ ଘଟୁଛି। ଏଭଳି ପ୍ରାକୃତିକ ବିପର୍ଯ୍ୟୟକୁ ରୋକିବା ଲକ୍ଷ୍ୟନେଇ ରାଜ୍ୟ ସରକାର ବନବିଭାଗ ସହଯୋଗରେ ଚଳିତବର୍ଷ ବ୍ୟାପକ ପରିମାଣରେ ତାଳଗଛ ବନୀକରଣ ପାଇଁ ପଦକ୍ଷେପ ଗ୍ରହଣ କରିଛନ୍ତି। ରାଜ୍ୟରେ ବିଭିନ୍ନ ପର୍ଯ୍ୟାୟରେ ୮କୋଟି ତାଳଗଛ ବନୀକରଣ ଲକ୍ଷ୍ୟ ରଖାଯାଇଛି। ୨୦୨୪-୨୫ ଏବଂ ୨୦୨୫-୨୬ ଆର୍ଥୀକ ବର୍ଷରେ ରାଜ୍ୟ ରିଲିଫ ଆୟୁକ୍ତ ପାଣ୍ଠିରୁ ୭.୫୯କୋଟି ଟଙ୍କା ବ୍ୟୟରେ ୧୯ଲକ୍ଷ ତାଳଗଛ ବନୀକରଣ ପାଇଁ ଲକ୍ଷ୍ୟଧାର୍ଯ୍ୟ କରାଯାଇଛି। ସେହି ଅନୁସାରେ ଚଳିତବର୍ଷ ବୌଦ୍ଧ ବନଖଣ୍ଡ ପକ୍ଷରୁ ପୁରୁଣାକଟକ, ମାଧପୁର, ବୌଦ୍ଧ, କଣ୍ଟାମାଳ, ମନମୁଣ୍ଡା ଭଳି ୫ଟି ରେଞ୍ଜରେ ୫୩ହଜାର ତାଳଚାରା ଲଗାଯିବା ପାଇଁ ଲକ୍ଷ୍ୟଧାର୍ଯ୍ୟ କରାଯାଇଛି। ସେଥିରୁ ପୁରୁଣାକଟକରେ ୮ହଜାର, ମାଧପୁରରେ-୧୫ହଜାର, ବୌଦ୍ଧରେ-୩୧୫୨, ମନମୁଣ୍ଡାରେ-୧୪ହଜାର, କଣ୍ଟାମାଳରେ-୧୨୮୪୮ ଟି ତାଳଚାରା ରୋପଣ ପାଇଁ ଲକ୍ଷ୍ୟ ରଖାଯାଇଛି। ଏଥିପାଇଁ ବିଭିନ୍ନ ରେଞ୍ଜ ପକ୍ଷରୁ ତାଳ ମଞ୍ଜି କ୍ରୟ ପ୍ରକିୟା ଆରମ୍ଭ ହୋଇଛି।
ବର୍ତମାନ ସୁଦ୍ଧା ୩୨ହଜାର ତାଳଚାରା ସଂଗ୍ରହ କରାଯାଇଥିବାବେଳେ ବିଭିନ୍ନ ରେଞ୍ଜ ପକ୍ଷରୁ ୧୦ହଜାର ଚାରା ରୋପଣ ସରିଥିବା ଜଣାପଡ଼ିଛି। ଉକ୍ତ ତାଳମଞ୍ଜିକୁ ସଂରକ୍ଷିତ ଜଙ୍ଗଲର ସୀମାନ୍ତରେ ଲଗାଯିବାକୁ ଲକ୍ଷ ରଖାଯାଇଛି। ସଂରକ୍ଷିତ ଜଙ୍ଗଲ ସୀମାନ୍ତରେ ତାଲଚାରା ରୋପଣ ଦ୍ୱାରା ସୀମାନ୍ତ ଅଂଚଳ ଚିହ୍ନଟରେ ସହଜ ହେବ। ଅନ୍ୟପଟେ ବଜ୍ରପାତ ପ୍ରଶମନ ସାଙ୍ଗକୁ ହାତୀମାନଙ୍କ ଆହାର ପାଇଁ ଏହା ବେଶ ସହାୟକ ହୋଇପାରିବ।ରାଜ୍ୟସରକାରଙ୍କ ଏଭଳି ପଦକ୍ଷେପକୁ ସବୁ ମହଲରେ ସ୍ୱାଗତ କରାଯାଇଛି। ବର୍ତମାନ ବିଭିନ୍ନ ରେଞ୍ଜରେ ତାଳଚାରା ରୋପଣ କାର୍ଯ୍ୟ ମଧ୍ୟ ଆରମ୍ଭ ହୋଇଯାଇଛି। ସେହିପରି ନୟାଗଡ଼ ମହାନଦୀ ବନ୍ୟପ୍ରାଣୀ ବନଖଣ୍ଡ ଅଧିନସ୍ଥ କୁଶଙ୍ଗ ବନ୍ୟପ୍ରାଣୀ ଅଭୟାରଣ୍ୟର ସୀମାନ୍ତ ଅଂଚଳରେ ଚଳିତବର୍ଷ ୨୦ହଜାର ତାଳଚାରା ରୋପଣ କରାଯିବାକୁ ଲକ୍ଷ୍ୟ ରଖାଯାଇଛି। ଏହାକୁ ଦୃଷ୍ଟିରେ ରଖି ବନ୍ୟପ୍ରାଣୀ ଅଭୟାରଣ୍ୟ ପକ୍ଷରୁ ତାଳଚାରା ରୋପଣ ପାଇଁ ମଞ୍ଜି ସଂଗ୍ରହ ସହିତ ରୋପଣକାର୍ଯ୍ୟ ହାତକୁ ନିଆଯାଇଥିବା ଜଣାପଡ଼ିଛି। ଏହାକୁ ଦୃଷ୍ଟିରେ ରଖି ତାଳଗଛ ସଂରକ୍ଷଣ ଉପରେ ନୂଆ ନିୟମ ଜାରି କରାଯାଇଛି। ରାଜ୍ୟରେ ଗତ ୧୨ବର୍ଷରେ ବଜ୍ରପାତରେ ୪ ହଜାର୪୭ ଜଣଙ୍କ ଜୀବନହାନୀ ଘଟିଥିବାବେଳେ ପ୍ରତିବର୍ଷ ୩୩୭ଜଣଙ୍କ ଜୀବନହାନୀ ଘଟୁଛି। ତେଣୁ ବଜ୍ରପାତ ଜନିତ ମୃତ୍ୟୁ ହ୍ରାସ ଦିଗରେ ତାଳଗଛ ସଂରକ୍ଷଣ ଚିନ୍ତା ଏବେ ସରକାରଙ୍କୁ ଘାରିଛି। ଗୋଟିଏ ପଟେ ତାଳଗଛ ସଂରକ୍ଷଣ ଚିନ୍ତା ସରକାର କରୁଥିବାବେଳେ ବିଗତ ଦିନରେ ବୌଦ୍ଧ ଜିଲ୍ଲାରୁ ବାହାରରାଜ୍ୟ ଆନ୍ଧ୍ର ଏବଂ ତାମିଲନାଡୁକୁ ତାଳଗଛ ପଟା ଚାଲାଣ ହେଉଥିଲା। ତାଳ ଗଛ ସଂରକ୍ଷଣ ଦିଗରେ ନୂଆ ନିୟମ ପରେ ତାଳଗଛ କଟା ଉପରେ ମଧ୍ୟ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଲକ୍ଷ ରଖଯାଇଛି।
