ଇସଲାମାବାଦ : ୨୬/୧୧ ମୁମ୍ବଇ ଆକ୍ରମଣର ମାଷ୍ଟରମାଇଣ୍ଡ ଏବଂ ଜମାତ-ଉଦ-ଦାବାର ମୁଖ୍ୟ ହାଫିଜ ସୟିଦଙ୍କୁ ପାକିସ୍ତାନର ଲାହୋର ସହରରୁ ଗିରଫ କରାଯାଇଛି। ୨୦୦୯ ସମ୍ପର୍କିତ ଏକ ଆତଙ୍କବାଦ ମାମଲାରେ ସୟିଦଙ୍କୁ ଆତଙ୍କବାଦ ନିରୋଧ ବିଭାଗ ଗିରଫ କରିଥିବା ଖବର ମିଳିଥିଲା। ଏବେ ସୟିଦଙ୍କ ଗିରଫଦାରୀ ନେଇ ଚାଞ୍ଚଲ୍ୟକର ତଥ୍ୟ ପଦାକୁ ଆସିଛି। ସୂଚନା ଅନୁସାରେ ସୟିଦଙ୍କୁ କୌଣସି ଜେଲରେ ନୁହେଁ ବରଂ ଏକ ବଙ୍ଗଳାରେ ରଖି ଭିଆଇପି ଆତିଥ୍ୟ ପ୍ରଦାନ କରାଯାଉଛି।
ସୂଚନା ଅନୁସାରେ ଗିରଫଦାରୀ ପରେ ହାଫିଜ ପୁଲିସ୍ ଗାଡ଼ିରେ ନୁହେଁ ବରଂ ନିଜ ବିଳାସପୂର୍ଣ୍ଣ ଗାଡ଼ିରେ ବଙ୍ଗଳାକୁ ଯାଇଥିଲା। ଦୁନିଆକୁ ଦେଖାଇବା ପାଇଁ ଏହି ଗିରଫଦାରୀ କରାଯାଇଛି। ତା ଲାଗି ରନ୍ଧା ଖାଦ୍ୟ ତା ଘରୁ ଆସୁଛି। ତା ରାତି ଜେଲରେ ନୁହେଁ ଜେଲରଙ୍କ ବଙ୍ଗଳାରେ କଟୁଛି। ଏହା ପୂର୍ବରୁ ପାକିସ୍ତାନର ଏକ ଆତଙ୍କବାଦ ନିରୋଧୀ ଅଦାଲତ ମଦ୍ରାସା ପାଇଁ ବେଆଇନ ଭାବେ ଜମି ଅଧିଗ୍ରହଣ କରିବା ମାମଲାରେ ୨୦୧୯ ଅଗଷ୍ଟ ୩ ପର୍ଯ୍ୟନ୍ତ ହାଫିଜ ସୟିଦ ଏବଂ ତାର ୩ ସହଯୋଗୀଙ୍କୁ ଅନ୍ତରୀଣ ଜାମିନ ପ୍ରଦାନ କରିଛନ୍ତି। ତେଣୁ ଏହି ଗିରଫଦାରୀ ଲୋକ ଦେଖାଣିଆ ବୋଲି କୁହାଯାଉଛି। ଫଳରେ ବିଶ୍ୱ ଆତଙ୍କବାଦୀ ଘୋଷିତ ହାଫିଜକୁ ନେଇ ପାକିସ୍ତାନର ଦୋମୁହାଁ ନୀତି ଏବେ ପଦାରେ ପଡିଛି।
Comments are closed.