ନୂଆଦିଲ୍ଲୀ: ଚଳିତବର୍ଷ ଅଗଷ୍ଟରେ ପୁଣିଥରେ କମିଛି ଦେଶର ଦ୍ରବ୍ୟ ଏବଂ ସେବା ଟିକସ (ଜିଏସ୍ଟି) ରାଜସ୍ୱ ସଂଗ୍ରହ । ଅଗଷ୍ଟରେ ଦେଶରେ ମୋଟ ୮୬,୪୪୯ କୋଟି ଟଙ୍କାର ଜିଏସ୍ଟି ସଂଗୃହୀତ ହୋଇଛି । ସେଥିମଧ୍ୟରେ କେନ୍ଦ୍ରୀୟ ଜିଏସ୍ଟିର ପରିମାଣ ୧୫୯୦୬ କୋଟି ଟଙ୍କା ରହିଥିବାବେଳେ ରାଜ୍ୟ ଜିଏସ୍ଟି ପରିମାଣ ୨୧୦୬୪ କୋଟି ଟଙ୍କା। ସେହିଭଳି ଏହି ମାସରେ ସମନ୍ୱିତ ଜିଏସ୍ଟି ବାବଦରେ ୪୨୨୪୬ କୋଟି ଟଙ୍କା ଆଦାୟ ହୋଇଛି । ସେଥିରେ ଆମଦାନୀ ସାମଗ୍ରୀ ଉପରେ ସଂଗୃହୀତ ରାଜସ୍ୱ ପରିମାଣ ୧୯୧୭୯ କୋଟି ଟଙ୍କା । ଏହାଛଡା ସେସ୍ ବା ଉପକର ବାବଦରେ ଏହି ମାସରେ ମୋଟ ୭୨୧୫ କୋଟି ଟଙ୍କା ସଂଗୃହୀତ ହୋଇଛି । ଏଥିରେ ଆମଦାନୀ ହେଉଥିବା ସାମଗ୍ରୀ ଉପରୁ ମିଳିଥିବା ଟିକସ ପରିମାଣ ୬୭୩ କୋଟି ଟଙ୍କା ଅନ୍ତର୍ଭୁକ୍ତ । ୨୦୧୯ ଅଗଷ୍ଟ ମାସରେ ଜିଏସ୍ଟି ବାବଦରେ ସରକାର ଯେତେ ରାଜସ୍ୱ ଆଦାୟ କରିଥିଲେ ଚଳିତବର୍ଷ ସେହି ମାସରେ ଏ ବାବଦ ଆୟ ୮୮ ଶତାଂଶ ରହିଛି । ଅର୍ଥାତ୍ ପୂର୍ବବର୍ଷ ତୁଳନାରେ ଜିଏସ୍ଟି ରାଜସ୍ୱ ସଂଗ୍ରହରେ ୧୨% ହ୍ରାସ ଘଟିଛି । ନିୟମିତ ପରିଶୋଧ ଅନୁସାରେ କେନ୍ଦ୍ର ସରକାର ସିଜିଏସ୍ଟି ବାବଦରେ ୧୮୨୧୬ କୋଟି ଟଙ୍କା ପ୍ରଦାନ କରିଛନ୍ତି । ଏହାଛଡା ସମନ୍ୱିତ ଜିଏସ୍ଟିରୁ ରାଜ୍ୟ ଜିଏସ୍ଟି ବାବଦକୁ ୧୪୬୫୦ କୋଟି ଟଙ୍କା ଦିଆଯାଇଛି।
Comments are closed.