ଗୋପାଳପୁର: ବ୍ରହ୍ମପୁର ବିଶ୍ଵବିଦ୍ୟାଳୟ ର ଜନୈକ ଛାତ୍ର ସମୁଦ୍ର ରେ ଭାସି ଯାଉଥିବା ବେଳେ ବେଳାଭୂମି ରେ ନିୟୋଜିତ ରହିଥିବା ଲାଇଫ ଗାର୍ଡ ଏବଂ ଏନ୍ ଏ ସି ପକ୍ଷରୁ ସଫେଇ କାର୍ଯ୍ୟ ତଦାରଖ ନିମନ୍ତେ ନିୟୋଜିତ ରହିଥିବା କର୍ମଚାରୀ ଙ୍କ ଉପସ୍ଥିତି ବୁଦ୍ଧି ଯୋଗୁଁ ନିଶ୍ଚିତ ମୃତ୍ୟୁ ମୁଖରୁ ଉଦ୍ଧାର କରିବାରେ ସଫଳ ହୋଇଥିବା ଜଣାପଡିଛି। ଆଜି ଅପରାହ୍ନ ୩ ଟା ବେଳେ ବ୍ରହ୍ମପୁର ବିଶ୍ଵବିଦ୍ୟାଳୟ ର ୩ ଜଣ ଛାତ୍ର ଗୋପାଳପୁର ବୁଲିବାକୁ ଯାଇ ଗୋପାଳପୁର ରେ ପହଞ୍ଚିଥିଲେ। ସେଠାରେ କିଛି ସମୟ ବୁଲାବୁଲି କରିବା ପରେ ତିନିଜଣ ଯାକ ସମୁଦ୍ର ରେ ସ୍ନାନ କରୁଥିଲେ । କିନ୍ତୁ ଏମାନଙ୍କ ମଧ୍ୟରୁ ରାଜିବ ଲୋଚନ ଦାସ ନାମକ ଜଣେ ଛାତ୍ର ସମୁଦ୍ର ଢେ଼ଉ ପ୍ରଭାବରେ ସମୁଦ୍ର ମଧ୍ୟକୁ ଭାସି ଯାଇଥିଲେ।
ଏହି ସମୟରେ ବେଳାଭୂମିରେ ନିୟୋଜିତ ରହିଥିବା ପୁଲିସ ଗୃହରକ୍ଷୀ ତଥା ଲାଇଫ ଗାର୍ଡ ଲିଙ୍ଗରାଜ ବେହେରା ଏକ ଟିୟୁବ ସାହାଯ୍ୟରେ ସମୁଦ୍ର ମଧ୍ୟକୁ ପସି ଥିଲେ ସୁଦ୍ଧା ଛାତ୍ର ଜଣଙ୍କୁ ଉଦ୍ଧାର କରିବାରେ ସକ୍ଷମ ହୋଇ ପାରିନଥିଲେ।ଏପରି ସ୍ଥିତିରେ ବେଳାଭୂମି ପରିସରରେ ସଫେଇ କାର୍ଯ୍ୟ ରେ ନିୟୋଜିତ ରହିଥିବା ସନ୍ତୋଷ ନାୟକ, ଦେବେନ୍ଦ୍ର ନାୟକ ଓ ମିଥୁନ ନାୟକ ମଧ୍ୟ ସମୁଦ୍ର ରେ ପସି ଛାତ୍ରଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲେ। କିନ୍ତୁ ପାଣିର ସ୍ରୋତ ପ୍ରଖର ଥିବାରୁ ଛାତ୍ର ଜଣକ କୂଳଠାରୁ ପ୍ରାୟ ୭୦୦ ମିଟର ଦୂରକୁ ଚାଲି ଯାଇଥିଲେ।ଏହି ସମୟରେ ସମୁଦ୍ର ରେ ଜଳକ୍ରୀଡା ନିମନ୍ତେ ବ୍ୟବହୃତ ବୋଟ ର କେତେକ କର୍ମଚାରୀ ଛାତ୍ର ଜଣଙ୍କୁ ଉଦ୍ଧାର କରି ପୁଲିସ ର ଜିମା ଦେଇଥିଲେ। ଉଦ୍ଧାର ପରେ ବେଳାଭୂମି ରେ ପ୍ରାଥମିକ ଚିକିତ୍ସା ପରେ ଛାତ୍ର ଜଣଙ୍କୁ ଅନ୍ୟ ଛାତ୍ରମାନଙ୍କ ଜିମା ଦିଆଯାଇଥିଲା। ଛାତ୍ର ଜଣକ ସୁସ୍ଥ ଥିବା ଜଣାପଡିଛି
