ତିରୁଅନନ୍ତପୁରମ : ଗୁଗଲ୍ ମ୍ୟାପ୍ରେ ତ୍ରୁଟିପୂର୍ଣ୍ଣ ସୂଚନାକୁ ଆଧାର କରି ଯାଉଥିବାବେଳେ ପର୍ଯ୍ୟଟକ ଦଳ କେରଳର କୋଟ୍ଟାୟାମ ଜିଲା ଅନ୍ତର୍ଗତ କୁରୁପ୍ପାନଥାରା ସହର ନିକଟରେ ଥିବା ଏକ ଜଳାଶୟ ମଧ୍ୟକୁ ପ୍ରବେଶ କରିଥିବା ଘଟଣା ଚର୍ଚ୍ଚାର ବିଷୟ ପାଲଟିଛି। ହାଇଦ୍ରାବାଦରୁ ଆସିଥିବା ଚାରି ଜଣିଆ ପର୍ଯ୍ୟଟକ ଦଳ କାର୍ ଯୋଗେ କେରଳର ଆଲାପୁଜାକୁ ଯାତ୍ରା କରୁଥିଲେ। ତେବେ ରାସ୍ତା ଜାଣିନଥିବାରୁ ସେମାନେ ଗୁଗଲ୍ ମ୍ୟାପ୍ର ସହାୟତା ନେଇଥିଲେ। ମ୍ୟାପ୍ରେ ଥିବା ସୂଚନାକୁ ଆଧାର କରି ଆଗକୁ ଯାଉଥିବାବେଳେ ହଠାତ୍ ଏକ ଜଳାଶୟ ମଧ୍ୟକୁ ସେମାନଙ୍କ କାର୍ ପଶିଯାଇଥିଲା। ସ୍ଥାନୀୟ ଲୋକଙ୍କ ସହାୟତାରେ ୪ ପର୍ଯ୍ୟଟକ ଉଦ୍ଧାର ପାଇଥିଲେ ସୁଦ୍ଧା ସେମାନଙ୍କ କାର୍ଟି ପାଣିରେ ବୁଡିଯାଇଥିବା ଜଣାପଡିଛି। ପାଣିରୁ କାର୍କୁ ବାହାର କରିବାକୁ ଉଦ୍ୟମ ଜାରି ରହିଛି। ସୂଚନାଯୋଗ୍ୟ ଗତବର୍ଷ ତଳେ ଦୁଇ ଜଣ ଡାକ୍ତର ଗୁଗଲ୍ ମ୍ୟାପ ଦେଖି ଯାଉଥିବାବେଳେ ନଦୀଗର୍ଭକୁ ଖସିପଡି ପ୍ରାଣ ହରାଇଥିଲେ। ଏହି ପରିପ୍ରେକ୍ଷୀରେ ବର୍ଷା ଋତୁରେ ଏଠାକୁ ବୁଲି ଆସୁଥିବା ପର୍ଯ୍ୟଟକଙ୍କୁ ଗୁଗଲ୍ ମ୍ୟାପ୍ ଅନୁସରଣ ନ କରିବାକୁ କେରଳ ପୁଲିସ ପକ୍ଷରୁ ସତର୍କତା ଜାରି କରାଯାଇଛି।
Comments are closed.