କଟକ : ରାଉସାପାଟଣା ଦୁର୍ଗା-କାଳୀ ପୂଜାକମିଟି ପକ୍ଷରୁ ପୂଜାମଣ୍ଡପ ନିକଟରେ ଗାନ୍ଧିଜୀଙ୍କ ୧୫୦ ତମ ଜୟନ୍ତୀ ଅବସରରେ ଫଟୋଚିତ୍ର ପ୍ରଦର୍ଶନୀ ସୋମବାର ଉଦ୍ଘାଟିତ ହୋଇଯାଇଛି। କ୍ୟାଟ୍ର ପୂର୍ବତନ ଉପାଧ୍ୟକ୍ଷ ମନୋରଞ୍ଜନ ମହାନ୍ତି ଏହାକୁ ଉଦ୍ଘାଟନ କରିଥିଲେ। ଗାନ୍ଧିଜୀ ୧୯୨୧ ମସିହାରେ କଟକ ଆସିଥିବା ଅବସରରେ ସେ ବ୍ୟବହାର କରିଥିବା ଚୌକି ଓ ଦରି ଏଥିରେ ପ୍ରଦର୍ଶିତ କରାଯାଇଛି। ଏଥିସହ ସେ ବ୍ୟବହାର କରିଥିବା ଘଣ୍ଟା, ଚଷମା, କଠଉ, ଅରଟ ସମେତ ୮୦ରୁ ଊର୍ଦ୍ଧ୍ବ ବିରଳ ଫଟୋଚିତ୍ର ପ୍ରଦର୍ଶନୀରେ ସ୍ଥାନ ପାଇଛି। ଏହି ଦୁର୍ଲ୍ଲଭ ସାମଗ୍ରୀକୁ ଦିଲ୍ଲୀସ୍ଥିତ ଜାତୀୟ ଗାନ୍ଧୀ ସଂଗ୍ରହାଳୟରୁ ଅଣାଯାଇଛି। ଦଶମୀ ପର୍ଯ୍ୟନ୍ତ ଏହି ପ୍ରଦର୍ଶନୀ ଚାଲିବ। ଜାତିର ପିତାଙ୍କ ନିତ୍ୟ ବ୍ୟବହାର୍ଯ୍ୟସାମଗ୍ରୀ ଦେଖିବାକୁ ବେଶ୍ ଭିଡ ପରିଲକ୍ଷିତ ହେଉଛି। ପୂଜା କମିଟି ସଭାପତି ଗୌର ଗୋପାଲ ସେନ୍, କାର୍ଯ୍ୟକାରୀ ସଭାପତି ଦିଲ୍ଲୀପ କୁମାର ଦାସ, ଉପସଭାପତି ଦେବଦତ୍ତ ସେନ୍, ସନ୍ତୋଷ କୁମାର ଦାସ, କାର୍ଯ୍ୟକାରୀ ସମ୍ପାଦକ ଅର୍ଣ୍ଣଦା ଚନ୍ଦ୍ର ଦାସ, ସାଧାରଣ ସମ୍ପାଦକ ମୀନକେତନ ଦାସ,ସହ ସମ୍ପାଦକ କୃଷ୍ଣଚନ୍ଦ୍ର ସେନ୍, ହରିହର ସେନ୍, ନରାୟଣ ଦାସ, ପ୍ରଭାତଚନ୍ଦ୍ର ଦାସ, କୋଷାଧ୍ୟକ୍ଷ ନାରାୟଣ ସେନ୍ ପ୍ରମୁଖ ଏହି କାର୍ଯ୍ୟକ୍ରମ ପରିଚାଳନା କରିଥିଲେ।
