ଇଂରେଜଙ୍କୁ ବିତାଡିତ କରିବା ନିମନ୍ତେ ମହାତ୍ମା ଗାନ୍ଧୀ ସେ ସମୟରେ ସମସ୍ତ ପ୍ରକାର ପଦକ୍ଷେପ ନେବା ସହ ସଂଗ୍ରାମୀମାନଙ୍କୁ ଉତ୍ସାହିତ କରୁଥିଲେ। ରାଷ୍ଟ୍ରପିତାଙ୍କ ତତ୍କାଳୀନ ଭାଷଣରେ ଅନୁପ୍ରାଣିତ ହୋଇ ଆଲିଗଡ଼ ବିଶ୍ବବିଦ୍ୟାଳୟର ଛାତ୍ରମାନ ସ୍ବାଧୀନତା ସଂଗ୍ରାମରେ ଅଂଶ ଗ୍ରହଣ କରିବା ସହ ବିଦେଶୀ କପଡ଼ାକୁ ଜାଳିପୋଡ଼ି ଦେଇଥିଲେ। ବିଶ୍ବବିଦ୍ୟାଳୟରେ ସମସ୍ତ ଛାତ୍ର ଖଦି ପୋଷାକ ପିନ୍ଧିବା ବାଧ୍ୟତାମୂଳକ ନିୟମ ଥିଲା। ଐତିହାସିକ ପ୍ରଫେସର ଇରଫାନ୍ ହବିବ୍ଙ୍କ ମତରେ ପ୍ରଥମଥର ଗାନ୍ଧିଜୀ ମହମ୍ମଡାନ ଆଙ୍ଗଲୋ ଓରିଏଣ୍ଟାଲ କଲେଜ ୧୯୧୬ରେ ଆସିଥିଲେ। ୧୯୨୦ବେଳକୁ ଏହି କଲେଜ ଆଲିଗଡ଼ ବିଶ୍ବବିଦ୍ୟାଳୟ ନାମରେ ପରିଚିତ ହେଲା। ସେଇ ସମୟରେ ଆଲିଗଡ଼ ବିଶ୍ବବିଦ୍ୟାଳୟକୁ ମହାତ୍ମା ଗାନ୍ଧୀଙ୍କର ଦ୍ବିତୀୟ ଗସ୍ତ ହେଲା। ତୃତୀୟ ଥର ୧୯୨୯ରେ ଗାନ୍ଧିଜୀ ସପତ୍ନୀକ କସ୍ତୁରବାଙ୍କ ସହ ବିଶ୍ବବିଦ୍ୟାଳୟକୁ ଯାଇଥିଲେ। କର୍ତ୍ତୃପକ୍ଷଙ୍କ କହିବାନୁସାରେ ଗାନ୍ଧିଜୀଙ୍କ ୩ଥର ଏଠାକୁ ଗସ୍ତ ନିଶ୍ଚିତ ଭାବେ ବିଶ୍ବବିଦ୍ୟାଳୟର ସ୍ବର୍ଣ୍ଣିମ ଇତିହାସରେ ଚିରଦିନ ଲିପିବଦ୍ଧ ହୋଇରହିବ। ଗାନ୍ଧିଜୀଙ୍କ ସମ୍ମାନରେ ଏବେ ମଧ୍ୟ ବିଶ୍ବବିଦ୍ୟାଳୟରେ ଅଗଷ୍ଟ ୧୫, ଅକ୍ଟୋବର ୨ରେ ସମସ୍ତ କର୍ମଚାରୀ ଓ ଛାତ୍ରଛାତ୍ରୀ ଖଦି ପୋଷାକ ପିନ୍ଧି ଆସିବାର ନିୟମ ରହିଛି।
