ନୂଆଦିଲ୍ଲୀ : ଜୁଆ ଖେଳରେ ପତ୍ନୀ ଓ ଦୁଇ ସନ୍ତାନଙ୍କୁ ବାଜି ଲଗାଇବା ଓ ବାଜି ହାରିବା ଘଟଣା ଏଠାରେ ଚର୍ଚ୍ଚାର ବିଷୟ ହୋଇଛି। ଉତ୍ତରପ୍ରଦେଶ ବୁଲନ୍ଦସହର ଅଞ୍ଚଳର ଯୁବକ ମୋହସିନ ଏହି ବାଜି ଲଗାଇଥିବାବେଳେ ଇମ୍ରାନ ନାମକ ଯୁବକ ବାଜି ଜିତିଥିଲେ। ଇମ୍ରାନ ବାଜି ଜିତିବା ପରେ ମୋହସିନର ଘରକୁ ଆସି ତାର ପତ୍ନୀକୁ ସାଥିରେ ନେବାକୁ ବାଧ୍ୟ କରିଥିଲା। ତେବେ ମୋହସିନର ପତ୍ନୀ ଏହାକୁ ବିରୋଧ କରିଥିଲା। ପରେ ଗାଁ ପଞ୍ଚାୟତ ବସି ଏହାର ସମାଧାନ ବାଟ ବାହାର କରିଥିଲା। ପଞ୍ଚାୟତ ନିର୍ଦେଶ ଦେଇଥିଲା ଯେ ମୋହସିନ ତାର ଗୋଟିଏ ସନ୍ତାନକୁ ଇମ୍ରାନକୁ ଦେବାକୁ ପଡିବ। ପଞ୍ଚାୟତର ନିର୍ଦେଶକ୍ରମେ ମୋହସିନର ଗୋଟିଏ ସନ୍ତାନକୁ ଇମ୍ରାନ ନେଇ ଯାଇଥିଲା। ପରବର୍ତ୍ତୀ ସମୟରେ ମୋହସିନକୁ ତାର ପତ୍ନୀ ଛାଡପତ୍ର ଦେବା ସହିତ ପୁଲିସରେ ଅଭିଯୋଗ କରିଥିଲା। ପୁଲିସ ଏବେ ମାମଲା ରୁଜୁ କରି ପଞ୍ଚାୟତ ନେତା ଓ ଇମ୍ରାନକୁ ତଲାସ କରୁଛି। ଦ୍ୱାପର ଯୁଗରେ ପାଣ୍ଡବମାନେ ପତ୍ନୀ ଦୌପଦୀଙ୍କୁ ପଶା ଖେଳରେ ବାଜି ଲଗାଇ କୌରବଙ୍କ ନିକଟରେ ହାରିଯାଇଥିଲେ। ଯାହା ପରବର୍ତ୍ତୀ ସମୟରେ ମହାଭାରତ ଯୁଦ୍ଧ ପାଇଁ ବାଟ କଢାଇଥିଲା।
