ନୂଆଦିଲ୍ଲୀ: ଭାରତରେ ନାଗରିକତା ସଂଶୋଧନ ଆଇନ(ସିଏଏ) ବିରୋଧୀ ଆନ୍ଦୋଳନରେ ସାମିଲ ହୋଇ ଅଡୁଆରେ ପଡ଼ିଛନ୍ତି ନରୱେର ଜଣେ ମହିଳା ପର୍ଯ୍ୟଟକ। କେରଳରେ ସେ ଏହି ଆନ୍ଦୋଳନରେ ସାମିଲ ହୋଇ ସୋସିଆଲ ମିଡିଆରେ ଏକ ଫଟୋ ପୋଷ୍ଟ କରିବା ପରେ ତାଙ୍କୁ ଦେଶ ଛାଡ଼ି ଚାଲିଯିବାକୁ ବିଦେଶ ଆଞ୍ଚଳିକ ପଞ୍ଜୀକରଣ କାର୍ଯ୍ୟାଳୟ(ଏଫଆରଆରଓ) ପକ୍ଷରୁ କୁହାଯାଇଛି। ଏହି ପର୍ଯ୍ୟଟକଙ୍କ ନାମ ହେଉଛି ଜେନ୍ ମେଟ୍ଟେ ଜୋହାନସନ। ସରକାରଙ୍କ ପକ୍ଷରୁ ନିର୍ଦେଶ ମିଳିବା ପରେ ସେ ଫେସବୁକରେ ଆଉ ଏକ ପୋଷ୍ଟ କରି ସମସ୍ତଙ୍କୁ ଧନ୍ୟବାଦ ବୋଲି ଉଲ୍ଲେଖ କରିଛନ୍ତି।
୭୪ ବର୍ଷୀୟା ଜୋହାନସନ ୨ମାସ ତଳେ ପର୍ଯ୍ୟଟକ ଭିଜାରେ ଭାରତ ଆସିଥିଲେ। କିନ୍ତୁ ଗତ ସୋମବାର ସେ କେରଳରେ ଲେଖକ, ଚଳଚ୍ଚିତ୍ର କଳାକାରଙ୍କ ପକ୍ଷରୁ ଆୟୋଜିତ ସିଏଏ ବିରୋଧୀ ଆନ୍ଦୋଳନରେ ସାମିଲ ହୋଇଥିଲେ। ଏହା ପରେ ନିଜର ଏକ ଫଟୋ ଶେୟାର କରିଥିଲେ। ଏହା ସହିତ ସେ ଲେଖିଥିଲେ, ରାଲି ଅତନ୍ତ୍ୟ ଶାନ୍ତିପୂର୍ଣ୍ଣ ଭାବେ ଆୟୋଜିତ ହୋଇଥିଲା। କୌଣସି ଦଙ୍ଗା ହୋଇ ନ ଥିଲା। ଲୋକମାନେ କେବଳ ସେମାନଙ୍କ ସ୍ବର ଉତ୍ତୋଳନ କରିଥିଲେ। ପୁଲିସ ବି ବହୁତ ସହଯୋଗ କରିଥିଲା। ଏହା ପରେ ତାଙ୍କୁ ଏଫଆରଆରଓ ପକ୍ଷରୁ ଗୁରୁବାର ସମନ ଜାରି କରାଯାଇଥିଲା। ସେ କାର୍ଯ୍ୟାଳୟରେ ହାଜର ହେବା ପରେ ସିଏଏ ରାଲିରେ ସାମିଲ ହେବା ନେଇ ତାଙ୍କୁ ପଚରାଉଚରା କରାଯାଇଥିଲା। ଏହା ପରେ ସେ ଭିଜା ନିୟମ ଉଲ୍ଲଂଘନ କରିଥିବାରୁ ତାଙ୍କୁ ଦେଶ ଛାଡ଼ି ଫେରିଯିବାକୁ ନିର୍ଦେଶ ଦିଆଯାଇଛି। ସୂଚନାଯୋଗ୍ୟ, ଏଫଆରଆରଓ ଭାରତରେ ବିଦେଶୀମାନଙ୍କ ପଞ୍ଜୀକରଣ, ଚଳପ୍ରଚଳ ଏବଂ ରହଣୀ ଉପରେ ନଜର ରଖିଥାଏ। ଜୋହାନସନ ପର୍ଯ୍ୟଟକ ଭିଜାରେ ଭାରତ ବୁଲିବାକୁ ଆସି ଆନ୍ଦୋଳନରେ ସାମିଲ ହୋଇଥିବାରୁ ଏହା ଭିଜା ନିୟମକୁ ଉଲ୍ଲଂଘନ କରିଥିବା କୁହାଯାଇଛି।
