ଡେସ୍କ: ମ୍ୟାଜିକ ଦର୍ପଣ ବିକ୍ରି ନାଁରେ ଠକେଇ କରୁଥିବା ଏକ ରାକେଟର ୩ ଜଣଙ୍କୁ ଆଜି ଭୁବନେଶ୍ୱର ନୟାପଲ୍ଲୀ ପୁଲିସ ଗିରଫ କରିବାରେ ସକ୍ଷମ ହୋଇଛି। ସେମାନେ କାନପୁରର ଅବନୀଶ ଶୁକ୍ଲାଙ୍କୁ ୯ ଲକ୍ଷ ଟଙ୍କା ଠକିଥିବା ଜଣାପଡିଛି। ସୂଚନା ଅନୁଯାୟୀ, ଏହି ପ୍ରାଚୀନ ମ୍ୟାଜିକ୍ ଦର୍ପଣ ସାମ୍ନାରେ ଛିଡା ହେଲେ ଜଣେ ବ୍ୟକ୍ତିଙ୍କ ଉଲଗ୍ଣ ଛବି ଦେଖାଯିବ ଏବଂ ଆହୁରି ନିକଟତର ହେଲେ ସେହି ବ୍ୟକ୍ତିଙ୍କ କଙ୍କାଳ ଦେଖାଯିବ। ତେବେ ସେହି ମ୍ୟାଜିକ ଦର୍ପଣର ଅତି ପାଖକୁ ଗଲେ କିଛି ଦେଖାଯିବ ନାହିଁ।
ସୂଚନା ଅନୁଯାୟୀ, ଏହି ଠକେଇରେ ସାମିଲ ଥିବା ବିକ୍ରେତା, କ୍ରେତା ଏବଂ ମ୍ୟାଜିକ୍ ଦର୍ପଣର ପରୀକ୍ଷକ ଗୋଟିଏ ଗ୍ୟାଙ୍ଗରୁ ଆସିଛନ୍ତି ଏବଂ ସେମାନେ ସାଧାରଣ ଜନତାଙ୍କୁ ପ୍ରଲୋଭିତ କରି ପୁରାତନ ମ୍ୟାଜିକ୍ ଦର୍ପଣ କ୍ରୟ କଲେ କୋଟି କୋଟି ଟଙ୍କା ଲାଭ ହେବ ବୋଲି କହୁଥିଲେ।
ଏହି ଘଟଣାରେ ନୟାପଲ୍ଲି ଥାନାରେ ରୁଜ୍ଜୁ ମାମଲାରେ ଆଜି ପୁଲିସ ଭୁବନେଶ୍ୱରର ଏକ ତାରକା ହୋଟେଲରେ ରହୁଥିବା ୩ ଜଣଙ୍କୁ ଗିରଫ କରିଛି। ପଶ୍ଚିମବଙ୍ଗର ପାର୍ଥ ସିଂଘରେ (୪୬), ମଳୟ ସରକାର (୩୨) ଓ ସୁଦୀପ୍ତ ସିହ୍ନା ରାୟ (38)କୁ ଗିରଫ କରିଛି। ସେମାନଙ୍କ ଠାରୁ ପୁଲିସ ଏକ ମାରୁତି ସୁଜୁକି କାର, ୨୮ ହଜାର ଟଙ୍କା, ମ୍ୟାଜିକ୍ ଦର୍ପଣର ଭିଡିଓ ଥିବା ୫ଟି ମୋବାଇଲ୍ ଫୋନ ଓ ଏଗ୍ରିମେଣ୍ଟ କାଗଜପତ୍ର ଜବତ କରିବା ସହ ଜାଲିଆତି କାରବାର ଟଙ୍କା ଥିବା ଅଭିଯୁକ୍ତଙ୍କ ବ୍ୟାଙ୍କ ଆକାଉଣ୍ଟ ଫ୍ରିଜ୍ କରିଛି।
