ନୂଆଦିଲ୍ଲୀ: କୋଭିଡ-୧୯ ମହାମାରୀ ଦେଶରେ ରଚାଉଥିବା ମୃତ୍ୟୁର ତାଣ୍ଡବଲୀଳାରୁ ଏହାର ମୁକାବିଲା କ୍ଷେତ୍ରରେ ସମ୍ମୁଖ ଯୋଦ୍ଧା ସାଜିଥିବା ଡାକ୍ତରମାନେ ମଧ୍ୟ ବାଦ୍ ପଡୁନାହାନ୍ତି। ଗତବର୍ଷରୁ ଆରମ୍ଭ କରି ଏପର୍ଯ୍ୟନ୍ତ ଦେଶରେ ଏକ ହଜାରରୁ ଅଧିକ ଡାକ୍ତର କରୋନାରେ ପ୍ରାଣ ହରାଇସାରିଛନ୍ତି। ଇତିମଧ୍ୟରେ ଭାରତୀୟ ଚକିତ୍ସକ ସଂଘ (ଆଇଏମଏ)ର ପୂର୍ବତନ ସଭାପତି ଡା. କେ କେ ଅଗ୍ରୱାଲଙ୍କର ମଧ୍ୟ କୋଭିଡରେ ମୃତ୍ୟୁ ଘଟିଛି। ଦେଶର ଜଣେ ବିଶିଷ୍ଟ ଚିକିତ୍ସକ ଭାବେ ପରିଚି ଥିବା ଡା. ଅଗ୍ରୱାଲ ୨୦୧୦ରେ ପଦ୍ମଶ୍ରୀ ସମ୍ମାନ ମଧ୍ୟ ଲାଭ କରିଥିଲେ। ଜଣେ ଚିକିତ୍ସକ ଭାବରେ ସେ ତାଙ୍କ ଜୀବନ ଜନସାଧାରଣଙ୍କ ସେବା ଏବଂ ସ୍ୱାସ୍ଥ୍ୟ ସମ୍ପର୍କିତ ସଚେତନତା ସୃଷ୍ଟି ଉଦ୍ଦେଶ୍ୟରେ ଉତ୍ସର୍ଗ କରିଥିଲେ। ଏପରିକି କୋଭିଡ ମହାମାରୀ ସମୟରେ ସେ ଜନସାଧାରଣଙ୍କୁ ସଚେତନ କରିବା ଏବଂ ଏକାଧିକ ଭିଡିଓ ତଥା ଶିକ୍ଷଣୀୟ କାର୍ଯ୍ୟକ୍ରମ ମାଧ୍ୟମରେ ୧୦ କୋଟିରୁ ଅଧିକ ଲୋକଙ୍କ ନିକଟରେ ପହଞ୍ଚିବାକୁ ସମର୍ଥ ହୋଇଥିଲେ। ଜଣେ ହୃଦରୋଗ ବିଶେଷଜ୍ଞ ଥିବା ଡା.ଅଗ୍ରୱାଲ ହାର୍ଟ କେୟାର ଫାଉଣ୍ଡେସନ ଅଫ ଇଣ୍ଡିଆର ମୁଖ୍ୟ ମଧ୍ୟ ଥିଲେ। ଗତ ଫେବ୍ରୁଆରୀ ମାସରେ ସେ କୋଭିଡର ଦ୍ୱିତୀୟ ପାନ ଟିକା ନେଇଥିଲେ। ତେବେ କୋଭିଡରେ ଆକ୍ରାନ୍ତ ହେବାପରେ ତାଙ୍କୁ ନୂଆଦିଲ୍ଲୀସ୍ଥିତ ଅଖିଳ ଭାରତ ଆୟୁର୍ବିଜ୍ଞାନ ସଂସ୍ଥାନରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ଗତ ଏକ ସପ୍ତାହ ଧରି ସେ ଭେଣ୍ଟିଲେଟର ସହାୟତାର ରହିଥିଲେ। ଶେଷରେ ସୋମବାର ରାତି ୧୧.୩୦ରେ ତାଙ୍କର ପରଲୋକ ଘଟିଛି। ତାଙ୍କୁ ୬୨ବର୍ଷ ବୟସ ହୋଇଥିଲା।
Popular Categories
Previous article
Next article