ତୃଣମୂଳ କଂଗ୍ରେସରେ ଯୋଗଦେଲେ ପୂର୍ବତନ ବିଜେପି ମନ୍ତ୍ରୀ ଯଶୋବନ୍ତ ସିହ୍ନା
ପୂର୍ବତନ କେନ୍ଦ୍ର ଅର୍ଥମନ୍ତ୍ରୀ ଯଶୋବନ୍ତ ସିହ୍ନା ଆଜି ତୃଣମୂଳ କଂଗ୍ରେସରେ ଯୋଗ ଦେଇଛନ୍ତି। ଦଳ ମୁଖ୍ୟାଳୟରେ ସେ ଏକ କାର୍ଯ୍ୟକ୍ରମରେ ମମତା ବାନାର୍ଜୀଙ୍କ ନେତୃତ୍ୱାଧୀନ ତୃଣମୂଳ କଂଗ୍ରେସରେ ଯୋଗ ଦେଇଛନ୍ତି। ୮୩ ବର୍ଷୀୟ ପୂର୍ବତନ ବିଜେପି ନେତା ଯଶୋବନ୍ତ ବାଜପେୟୀ ସରକାରରେ ଅର୍ଥମନ୍ତ୍ରୀ ଥିଲେ। ତୃଣମୂଳ କଂଗ୍ରେସରେ ଯୋଗଦେବା ପରେ ସେ କହିଛନ୍ତି ଯେ ମମତା ବାନାର୍ଜୀ ତାଙ୍କୁ ପଶ୍ଚିମବଙ୍ଗର ସେବା କରିବାକୁ ଅନୁମତି ଦେଇଥିବାରୁ ସେ କୃତଜ୍ଞ। ଟି.ଏମ୍.ସି. ନେତା ଡେରେକ୍ ଓବ୍ରିଏନ୍, ସୁବ୍ରତ ମୁଖାର୍ଜୀ ଏବଂ ସୁଦୀପ ବନ୍ଦୋପାଧ୍ୟାୟଙ୍କ ଉପସ୍ଥିତିରେ ଶ୍ରୀ ସିହ୍ନା ତୃଣମୂଳ ଭବନଠାରେ ଦଳରେ ଯୋଗ ଦେଇଥିଲେ।
एक टाइग्रेस, दो लंगूर, खेला होबे खूब भरपूर।
— Yashwant Sinha (@YashwantSinha) March 7, 2021
ପଶ୍ଚିମବଙ୍ଗ ବିଧାନସଭା ନିର୍ବାଚନ ଘୋଷଣା ହେବା ପର ଠାରୁ ଯଶୋବନ୍ତ ତାଙ୍କ ଟ୍ୱିଟରରେ ଲଗାତାର କିଛି ନ କିଛି ବାର୍ତା ଦେଇ ଆସୁଛନ୍ତି। ପଶ୍ଚିମବଙ୍ଗ ନିର୍ବାଚନକୁ ସେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ କହିବା ସହ ଏହା ଭାରତ ପାଇଁ ପ୍ରମୁଖ ବିଷୟ ବୋଲି କହିଛନ୍ତି। ସେ କହିଥିଲେ ଯେ ବେଙ୍ଗଲର ଭୋଟରମାନେ ସେମାନଙ୍କ ଭୋଟ ମାଧ୍ୟମରେ ଭାରତର ଭାଗ୍ୟ ନିର୍ଣ୍ଣୟ କରିବେ। ଅନ୍ୟ ପକ୍ଷରେ ମମତା ବାନାର୍ଜୀଙ୍କ ଉପରେ ଆକ୍ରମଣ ପରେ ଯଶୋବନ୍ତ କହିଥିଲେ ଯେ ମମତାଙ୍କ ଉପରେ ଆକ୍ରମଣ ଘଟଣାକୁ ବିଜେପି ଉପହାସ କରିବା ଲଜ୍ଜାଜନକ। ସେ ନିଜ ଟ୍ୱିଟରରେ ଲେଖିଥିଲେ ଯେ ‘ଜଣେ ବାଘୁଣୀ, ଦୁଇ ମାଙ୍କଡ଼; ଏଥର ହେବ ଖେଳ।ବିଜେପିର ମମତାଙ୍କୁ ବାହାର ଲୋକ କହିବା ପ୍ରସଙ୍ଗରେ ଯଶୋବନ୍ତ କହିଥିଲେ ଯେ ମୋଦୀ ଓ ଶାହା କଣ ବେଙ୍ଗଲର ଅଧିବାସୀ।
୮୩ ବର୍ଷୀୟ ଶ୍ରୀ ସିହ୍ନା ୨୦୧୮ ମସିହାରେ ବିଜେପି ଛାଡ଼ିଥିଲେ। ୧୯୬୦ ବ୍ୟାଚ୍ର ଭାରତୀୟ ପ୍ରଶାସନିକ ଅଧିକାରୀ ଶ୍ରୀ ସିହ୍ନା ୧୯୮୪ ମସିହାରେ ରାଜନୀତିରେ ଯୋଗ ଦେଇଥିଲେ। ପ୍ରଥମେ ସେ ଜନତା ପାର୍ଟି ଏବଂ ପରେ ବିଜେପିରେ ସାମିଲ ହୋଇଥିଲେ। ୧୯୯୦ ମସିହାରେ ଶ୍ରୀ ସିହ୍ନା ପ୍ରଥମଥର ପାଇଁ ଅର୍ଥମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ। ୨୦୦୪ ମସିହାରେ ସେ ଦେଶର ବୈଦେଶିକ ମନ୍ତ୍ରୀ ଥିଲେ। ତାଙ୍କ ପୁଅ ଜୟନ୍ତ ସିହ୍ନା ବିଜେପିର ଜଣେ ସଦସ୍ୟ ଏବଂ ଝାଡ଼ଖଣ୍ଡର ହଜାରିବାଗ୍ ଆସନରୁ ସାଂସଦ ଅଛନ୍ତି।
