ଫ୍ଲିପ୍‍କାର୍ଟ ସିଇଓ ବିନ୍ନି ବଂସଲଙ୍କ ଇସ୍ତଫା

0

ନୂଆଦିଲ୍ଲୀ : ଦେଶର ଅଗ୍ରଣୀ ଇ-କମର୍ସ କମ୍ପାନୀ ଫ୍ଲିପକାର୍ଟ ସିଇଓ ବିନ୍ନି ବଂସଲ ମଙ୍ଗଳବର ନିଜ ପଦରୁ ଇସ୍ତଫା ଦେଇଛନ୍ତି। ଫ୍ଲିପ୍‍କାର୍ଟକୁ ଆମେରିକୀୟ କମ୍ପାନୀ ୱାଲମାର୍ଟ ଅଧିଗ୍ରହଣ କରିବାର ମାତ୍ର ୬ ମାସ ପରେ ଏହି ଆଶ୍ଚର୍ଯ୍ୟଜନକ ଘଟଣାକ୍ରମ ଦେଖିବାକୁ ମିଳିଛି। ପ୍ରକାଶଯୋଗ୍ୟ ଯେ ବିନ୍ନି ବଂସଲ ନିଜ ପୁରୁଣା ବନ୍ଧୁ ସଚିନ ବଂସଲଙ୍କ ସହ ମିଶି ଫ୍ଲିପ୍‍କାର୍ଟ କମ୍ପାନୀ ପ୍ରତିଷ୍ଠା କରିଥିଲେ। ଫ୍ଲିପ୍‍କାର୍ଟ ବିକ୍ରି ହେବା ସମୟରେ ସଚିନ୍‍ ନିଜ ପଦରୁ ଇସ୍ତଫା ଦେଇଥିଲେ। ଏବେ ନିଜ ପଦରୁ ଇସ୍ତଫା ଦେବା ପରେ ବିନ୍ନି କମ୍ପାନୀର ବୋର୍ଡରେ ରହିବେ କି ନାହିଁ ତାହା ସ୍ପଷ୍ଟ ହୋଇନାହିଁ।

ଷ୍ଟ୍ରିଟ୍‍ ଇନସାଇଟ୍‍ ୱେବସାଇଟ୍‍ ରିପୋର୍ଟ ଅନୁସାରେ ବିନ୍ନିଙ୍କ ବିରୋଧରେ ଅସଦାଚରଣ ଅଭିଯୋଗ ଆସିଥିଲା। ଫ୍ଲିପ୍‍କାର୍ଟ ଏବଂ ୱାଲମାର୍ଟ ପକ୍ଷରୁ ଅଭିଯୋଗର ସ୍ୱତନ୍ତ୍ର ତଦନ୍ତ କରାଯାଇଥିଲା। ସେତେବେଳେ ବିନ୍ନି ଅଭିଯୋଗକୁ ଭିତ୍ତିହୀନ ଓ ମିଥ୍ୟା କହି ଖଣ୍ଡନ କରିଥିଲେ। ପରେ ତଦନ୍ତରେ ବିନ୍ନି ସହଯୋଗ କରୁନଥିବା ଓ ତାଙ୍କ ଆଚରଣ ଠିକ୍‍ ନଥିବା ଅଭିଯୋଗ ହୋଇଥିଲା। ସବୁ ଆଡୁ ଚାପ୍‍ ପଡ଼ିବା ପରେ ବିନ୍ନି ନିଜ ପଦରୁ ଇସ୍ତଫା ଦେଇଛନ୍ତି। ୱାଲମାର୍ଟ ପକ୍ଷରୁ ଏକ ବିବୃତ୍ତି ଜାରି କରାଯାଇ କୁହାଯାଇଛି ଯେ ବିନ୍ନି ବଂସଲ ଫ୍ଲିପ୍‍କାର୍ଟ ସିଇଓ ପଦରୁ ଇସ୍ତଫା ଦେଇଛନ୍ତି ଓ ତାଙ୍କ ଇସ୍ତଫାକୁ ତତ୍କାଳ ପ୍ରଭାବରେ ଗ୍ରହଣ କରାଯାଇଛି।

Leave A Reply