ଚଣ୍ଡୀଗଡ଼..- ପଞ୍ଜାବର ମୋହାଲିରେ ଜଣେ ମହିଳା ଔଷଧ ନିରୀକ୍ଷଙ୍କୁ ଗୁଳି କରି ହତ୍ୟା କରାଯାଇଛି । ସେ ଏକ ଔଷଧ ଦୋକାନର ପଞ୍ଜୀକରଣକୁ ବାତିଲ କରିଦେବାରୁ ତାଙ୍କୁ ଜଣେ ଦୋକାନୀ ଗୁଳି କରି ହତ୍ୟା କରିଥିବା ସୂଚନା ମିଳିଛି । ମୃତ ଔଷଧ ନିରୀକ୍ଷଙ୍କ ନାମ ନେହା ଶୌରୀ ।
୧୦ ବର୍ଷ ତଳେ ବଲବିନ୍ଦର ସିଂଙ୍କ ଔଷଧ ଦୋକାନ ଉପରେ ପୁଲିସ ଚଢଉ କରିଥିଲା । ଔଷଧ ନିରୀକ୍ଷକ ନେହା ଏହାପରେ ଦୋକାନର ପଞ୍ଜୀକରଣ ବାତିଲ କରିଦେଇଥିଲେ । ଆଦାଲତରେ ଏ ନେଇ ଏକ ମାମଲା ରୁଜୁ କରିଥିଲେ ।
ବଲବିନ୍ଦର ଏକ ବନ୍ଧୁକ ସହ ନେହାଙ୍କ କାର୍ଯ୍ୟାଳୟରେ ପ୍ରବେଶ କରି ହାପି ହୋଲି କହିବା ସହ ଦୁଇଟି ଗୁଳି ଚଳାଇଥିଲା । ଗୋଟିଏ ଗୁଳି ନେହାଙ୍କ ମୁଣ୍ଡରେ ବାଜିଥିବା ବେଳେ ଆଉ ଗୋଟିଏ ତାଙ୍କ ଛାତିରେ ବାଜିଥିଲା । ବଲବିନ୍ଦର ସେଠାରୁ ଫେରାର ହେବା ପାଇଁ ଚେଷ୍ଟା କରିଥିଲା । ମାତ୍ର ଅନ୍ୟ କର୍ମଚାରୀମାନେ କାର୍ଯ୍ୟାଳୟର ପ୍ରବେଶଦ୍ୱାର ବନ୍ଦ କରି ଦେଇଥିଲେ । ବଲବିନ୍ଦର ଧରାପଡିଯିବା ଭୟରେ ନିଜ ମୁଣ୍ଡ ଓ ଛାତିକୁ ଗୁଳି କରିଥିଲା । ସେମାନଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାକୁ ନିଆଯାଇଥିଲା । ଡାକ୍ତର ଦୁଇଜଣଙ୍କୁ ମୃତ ଘୋଷଣା କରିଥିଲେ । ପୁଲିସ ଏକ ହତ୍ୟା ମାମାଲା ରୁଜି କରି ଘଟଣାର ତଦନ୍ତ କରୁଛି ।
