ଅମୃତସର : ପଞ୍ଜାବର ଅନ୍ତର୍ଜାତୀୟ ସୀମା ନିକଟରେ ସନ୍ଦେହଜନକ ଭାବେ ଏକ ପାରା ଧରାପଡିଛି। ବିପିଓ ରୋରାନୱାଲାରେ ଡ୍ୟୁଟିରେ ଥିବା ଜଣେ କନଷ୍ଟେବଳଙ୍କ ନିକଟକୁ ପକ୍ଷୀଟି ଉଡ଼ି ଆସୁଥିଲା। ତା’ ଗୋଡରେ ବନ୍ଧା ହୋଇଥିବା ଏକ କାଗଜ ଜବତ ହୋଇଛି ଏବଂ ପାରା ବିରୁଦ୍ଧରେ ଏକ ଏଫ୍ଆଇଆର୍ ରୁଜୁ କରାଯାଇଛି। ପାକିସ୍ତାନରୁ ପାରାଟି ଆସିଥିବା ସନ୍ଦେହ କରାଯାଉଛି ଏବଂ ଗୁପ୍ତଚର ବୃତ୍ତି ପାଇଁ ଏହାକୁ ନିୟୋଜିତ କରାଯାଇଥିବା ପୁଲିସ ଅନୁମାନ କରୁଛି।
ପାକିସ୍ତାନ ସୀମାଠାରୁ ୫୦୦ ମିଟର ଦୂରରେ ଥିବା ପୋଷ୍ଟରେ କ୍ୟାମ୍ପ ଗାର୍ଡ ଡ୍ୟୁଟିରେ ଥିବାବେଳେ କନଷ୍ଟେବଳ ନୀରଜ କୁମାରଙ୍କ କାନ୍ଧରେ ଏକ କଳା ଓ ଧଳା ମିଶା ରଙ୍ଗର ପାରାଟି ବସିଥିଲା। ଗତ ୧୭ ତାରିଖ ସନ୍ଧ୍ୟାରେ ଏହି ପାରାକୁ ଧରାଯାଇଥିଲା।
ଅଭିଯୋଗ ଅନୁଯାୟୀ, କନଷ୍ଟେବଳ ତୁରନ୍ତ ପାରାକୁ ଧରି ପୋଷ୍ଟ କମାଣ୍ଡର ଓମପାଲ ସିଂଙ୍କୁ ଜଣାଇଥିଲେ, ଯାହା ପରେ ସେ ପାରାକୁ ସ୍କାନ କରିଥିଲେ।
ପାରା ଗୋଡରେ ଏକ ଧଳା କାଗଜକୁ ଅଠା ଓ ଟେପ୍ ସହିତ ଗୁଡ଼ାଯାଇଥିବା ଦେଖିବାକୁ ମିଳିଥିଲା, ଯେଉଁଥିରେ ଏକ ନମ୍ବର ଲେଖାଯାଇଥିଲା। ଏହି ପାରା ବିରୋଧରେ ଅମୃତସରର କାହଗର ପୁଲିସ ଥାନାରେ ଏଫ୍ଆଇଆର୍ ରୁଜୁ କରାଯାଇଛି। ଏହି କାଗଜକୁ ନେଇ ଅଧିକ ଖୋଳତାଡ ଜାରି ରହିଛି।
ସୂଚନାଯୋଗ୍ୟ, ଅନ୍ୟ ଏକ ଘଟଣାରେ, ଗୁପ୍ତଚର ପାଇଁ ପାକିସ୍ତାନରେ ତାଲିମ ପାଇଥିବା ନେଇ ସନ୍ଦେହ କରାଯାଉଥିବା ଅନ୍ୟ ଏକ ପାରା, ୨୦୨୦ ମେ’ ମାସରେ ଜାମ୍ମୁ କାଶ୍ମୀରର କାଠୁଆ ଜିଲ୍ଲା ଅନ୍ତର୍ଗତ ଅନ୍ତର୍ଜାତୀୟ ସୀମାରେ ଧରା ହୋଇଥିଲା।
ଅଧିକାରୀମାନେ କହିଛନ୍ତି ଯେ ଏହି ପାରାଟି ଏକ “କୋଡେଡ୍ ମେସେଜ୍” ନେଇ ଆସିଥିଲା ଏବଂ ପାକିସ୍ତାନରୁ ଏହି ପଟକୁ ଉଡ଼ିଆସିବା ପରେ ହିରାନଗର ସେକ୍ଟରର ମାନାରି ଗାଁର ବାସିନ୍ଦା ତାକୁ ଧରିଥିଲେ।
