ଡେସ୍କ: ଦୁର୍ନୀତି ପ୍ରମାଣ ଚୋରି ମାମଲାରେ ସମ୍ପୃକ୍ତି ଅଭିଯୋଗରେ ଦିଲ୍ଲୀର ମୁଖ୍ୟ ଶାସନ ସଚିବ ନରେଶ କୁମାର ଏବଂ ତାଙ୍କ ଅଧୀନସ୍ଥ ୱାଇଭିଭିଜେ ରାଜଶେଖରଙ୍କ ବିରୋଧରେ ଏତଲା ରୁଜୁ କରାଯାଇଛି। ଉତ୍ତରାଖଣ୍ଡର ଆଲମୋଡ଼ାର ଏକ ଅଦାଲତକୁ ଏକ ସ୍ୱେଚ୍ଛାସେବୀ ସଂଗଠନ ‘ପ୍ଲିଜାଣ୍ଟ ଭ୍ୟାଲି ଫାଉଣ୍ଡେସନ୍’ ଅଭିଯୋଗ କରିବା ପରେ ଅଧିକାରୀମାନେ ୪ ଜଣଙ୍କୁ ପଠାଇ ଏକ ବିଦ୍ୟାଳୟରୁ ଦୁର୍ନୀତି ମାମଲାର ଗୁରୁତ୍ୱପୂର୍ଣ୍ଣ ଦସ୍ତାବିଜ ନେଇଯାଇଥିଲେ।
ଅଭିଯୋଗ ଅନୁଯାୟୀ, ଗତ ଫେବ୍ରୁଆରି ୧୪ ତାରିଖରେ ଏହି ୪ ଜଣ ବ୍ୟକ୍ତି ପ୍ଲିଜାଣ୍ଟ ଭ୍ୟାଲି ଫାଉଣ୍ଡେସନ୍ ଦ୍ୱାରା ପରିଚାଳିତ ଦାଦାକଡ଼ା ଗ୍ରାମରେ ଥିବା ଏକ ବିଦ୍ୟାଳୟକୁ ଯାଇ ଏନଜିଓର ଯୁଗ୍ମ ସଚିବଙ୍କ କାର୍ଯ୍ୟାଳୟ ଚାମ୍ବର ଭଙ୍ଗାରୁଜା କରିଥିଲେ। ଏହାପରେ ସେମାନେ କୁମାର ଓ ରାଜଶେଖରଙ୍କ ଦୁର୍ନୀତିରେ ସମ୍ପୃକ୍ତି ଥିବାର ପ୍ରମାଣ ଥିବା ଫାଇଲ, ଦସ୍ତାବିଜ, ରେକର୍ଡ ଏବଂ ପେନ୍ ଡ୍ରାଇଭ୍ ବଳପୂର୍ବକ ନେଇଯାଇଥିଲେ।
ଭିଜିଲାନ୍ସ ବିଭାଗ ଓ ଅନ୍ୟାନ୍ୟ ଫୋରମରେ ଏନ୍ଜିଓ ଅଧିକାରୀଙ୍କ ବିରୋଧରେ ଦାଖଲ ହୋଇଥିବା ଦୁର୍ନୀତି ଅଭିଯୋଗ ତୁରନ୍ତ ପ୍ରତ୍ୟାହାର କରା ନଗଲେ ସେମାନଙ୍କୁ ଫସାଇ ଦିଆଯିବ ବୋଲି ଧମକ ଦେଇଥିବା ଅଭିଯୋଗ ହୋଇଛି। ଏହାବ୍ୟତୀତ ୪ ଜଣ ଅଧିକାରୀ ସେମାନଙ୍କ ସହିତ ଆଣିଥିବା ଲିଖିତ ଦସ୍ତାବିଜରେ ଦସ୍ତଖତ କରିବାକୁ ବାଧ୍ୟ କରିଥିଲେ। ଅଭିଯୋଗ ଅନୁଯାୟୀ, ଅଭିଯୋଗକାରୀ ପ୍ରତିବାଦ କରିବାରୁ ସେମାନେ ନଗଦ ୬୩ ହଜାର ଟଙ୍କା ନେଇଯାଇଥିଲେ।
ଅଧିକାରୀଙ୍କ ବିରୋଧରେ ଆଇପିସିର ଧାରା ୩୯୨ (ଡକାୟତି), ୪୪୭ (ଅପରାଧିକ ଅନୁପ୍ରବେଶ), ୧୨୦ବି (ଅପରାଧିକ ଷଡ଼ଯନ୍ତ୍ର), ୫୦୪ (ଶାନ୍ତି ଭଙ୍ଗ କରିବା ଉଦ୍ଦେଶ୍ୟରେ ଉଦ୍ଦେଶ୍ୟମୂଳକ ଅପମାନ) ଏବଂ ୫୦୬ ଅପରାଧିକ ଧମକ) ଏବଂ ଏସସି/ଏସଟି ଆକ୍ଟ ଅନୁଯାୟୀ ମାମଲା ରୁଜୁ କରାଯାଇଛି।
Comments are closed.