ଭାରତୀୟ ଚଳଚ୍ଚିତ୍ର ନିର୍ମାତା ପାୟଲ କାପାଡିଆ କାନ୍ସରେ ଜିତିଲେ ଗ୍ରାଣ୍ଡପ୍ରି ପୁରସ୍କାର

ଡେସ୍କ: ଫିଲ୍ମ ନିର୍ମାତା ପାୟଲ କାପାଡିଆ ଆଜି ପ୍ରଥମ ଭାରତୀୟ ଚଳଚ୍ଚିତ୍ର ନିର୍ମାତା ଭାବେ ତାଙ୍କ ଚଳଚ୍ଚିତ୍ର ‘ଅଲ୍ ୱି ଇମାଜିନ୍ ଆଜ୍ ଲାଇଟ୍’ ପାଇଁ କାନ୍ ଫିଲ୍ମ ଫେଷ୍ଟିଭାଲରେ ଗ୍ରାଣ୍ଡପ୍ରି ପୁରସ୍କାର ଜିତି ଇତିହାସ ସୃଷ୍ଟି କରିଛନ୍ତି। ‘ଅନୋରା’ ପାଇଁ ଆମେରିକୀୟ ନିର୍ଦ୍ଦେଶକ ସିନ୍ ବେକରଙ୍କୁ ମିଳିଥିବା ପାଲମେ ଡି’ଓର ପରେ ଏହି ଚଳଚ୍ଚିତ୍ରକୁ ଉତ୍ସବର ଦ୍ବିତୀୟ ସମ୍ମାନଜନକ ପୁରସ୍କାର ମିଳିଥିଲା। ଗୁରୁବାର ରାତିରେ ପ୍ରଦର୍ଶିତ ହୋଇଥିବା କାପାଡିଆଙ୍କ ଏହି ଚଳଚ୍ଚିତ୍ର ୩୦ ବର୍ଷ ମଧ୍ୟରେ ପ୍ରଥମ ଭାରତୀୟ ଚଳଚ୍ଚିତ୍ର ଏବଂ କୌଣସି ଭାରତୀୟ ମହିଳା ନିର୍ଦ୍ଦେଶକଙ୍କ ଦ୍ୱାରା ପ୍ରଥମ ଥର ପାଇଁ ମୁଖ୍ୟ ପ୍ରତିଯୋଗିତାରେ ପ୍ରଦର୍ଶିତ ହୋଇଛି।

ଫ୍ରାନ୍ସିସ୍ ଫୋର୍ଡ କପୋଲା, ସିନ୍ ବେକର, ୟୋର୍ଗୋସ୍ ଲାନ୍ଥିମୋସ୍, ପଲ୍ ଶ୍ରାଡର୍, ମ୍ୟାଗ୍ନସ୍ ଭନ୍ ହର୍ଣ୍ଣ ଏବଂ ପାଓଲୋ ସୋରେଣ୍ଟିନୋଙ୍କ ଭଳି ବିଶ୍ୱପ୍ରସିଦ୍ଧ ନିର୍ଦ୍ଦେଶକଙ୍କ ସହ କାପାଡିଆଙ୍କ ପ୍ରତିଦ୍ୱନ୍ଦ୍ୱିତା ହୋଇଥିଲା। ଜୁରିରେ ‘ଲେଡିବର୍ଡ’ ଏବଂ ‘ବାର୍ବି’ର ନିର୍ଦ୍ଦେଶକ ଗ୍ରେଟା ଗର୍ଭିଗ୍ ଅଧ୍ୟକ୍ଷତା କରିଥିଲେ। ତିନି ବର୍ଷ ତଳେ ପାୟଲ କାପାଡିଆ କାନ୍ସରେ ‘ଏ ନାଇଟ୍ ଅଫ୍ ହନିଂ ନଥିଙ୍ଗ୍’ ପାଇଁ ଶ୍ରେଷ୍ଠ ଡକ୍ୟୁମେଣ୍ଟାରୀ ପାଇଁ ‘ଲେ ପ୍ରିକ୍ସ ଡୁ ଡକ୍ୟୁମେଣ୍ଟେୟାର’ ପୁରସ୍କାର ପାଇଥିଲେ। ‘ଅଲ୍ ୱି ଇମାଜିନ୍ ଆଜ୍ ଲାଇଟ୍’ ହେଉଛି ତାଙ୍କର ପ୍ରଥମ ଫିଚର ଫିଲ୍ମ। ଇଣ୍ଡୋ-ଫ୍ରାନ୍ସ ପ୍ରଡକ୍ସନ୍ ‘ଅଲ୍ ୱି ଇମାଜିନ୍ ଆଜ୍ ଲାଇଟ୍’ ପ୍ରଭା ନାମକ ଜଣେ ନର୍ସଙ୍କ କାହାଣୀ କୁହେ, ଯିଏ କି ତାଙ୍କ ବିଚ୍ଛିନ୍ନ ସ୍ୱାମୀଙ୍କଠାରୁ ଏକ ଅପ୍ରତ୍ୟାଶିତ ଉପହାର ପାଆନ୍ତି, ଯାହା ତାଙ୍କ ଜୀବନରେ ବାଧା ସୃଷ୍ଟି କରିଥାଏ। ପୂର୍ବରୁ କାନ୍ସ ପ୍ରତିଯୋଗିତା ବିଭାଗ ପାଇଁ ମନୋନୀତ ହୋଇଥିବା ଅନ୍ୟ ଭାରତୀୟ ଚଳଚ୍ଚିତ୍ରଗୁଡ଼ିକ ମଧ୍ୟରେ ଚେତନ ଆନନ୍ଦ, ଭି ଶାନ୍ତାରାମ, ରାଜ କପୁର, ସତ୍ୟଜିତ ରାୟ, ଏମଏସ ସାଥ୍ୟୁ ଏବଂ ମୃଣାଳ ସେନଙ୍କ କୃତି ଅନ୍ତର୍ଭୁକ୍ତ। ‘ନିଚା ନଗର’ ଏକମାତ୍ର ଭାରତୀୟ ଚଳଚ୍ଚିତ୍ର ଯିଏ ପାଲମେ ଡି’ଅର୍ ପୁରସ୍କାର ଜିତିଛି।