ନୂଆଦିଲ୍ଲୀ: ପେଟ୍ରୋଲ ଡିଜେଲର ବର୍ଦ୍ଧିତ ମୂଲ୍ୟକୁ ନେଇ ସମଗ୍ର ଦେଶରେ ରାଜନୀତି ସରଗରମ ରହିଛି। ଏପରିକ ଏକ୍ସସାଇଜ ଟିକସ ଓ ଭାଟକୁ ନେଇ କେନ୍ଦ୍ର ରାଜ୍ୟ ମଧ୍ୟରେ ଟଣାଓଟରା ଲାଗି ରହିଛି। ଏସବୁ ସତ୍ତେ୍ୱ କିଛି ରାଜ୍ୟରେ ପେଟ୍ରୋଲ ବିକ୍ରି କରିବାକୁ ଗ୍ରାହକଙ୍କୁ ଆକୃଷ୍ଟ କରିବା ପାଇଁ ମାଗଣା ଭୋଜନ ଓ ଚା’ ଦେଉଥିବା ନଜିରକୁ ଆସିଛି।
ଘଟଣା ଦୃଶ୍ୟମାନ ହେଉଛି ମଧ୍ୟପ୍ରଦେଶ ଓ ମହାରାଷ୍ଟ୍ର ସୀମାନ୍ତ ଏକ ପେଟ୍ରୋଲ ପମ୍ପରେ। ମଧ୍ୟପ୍ରଦେଶରେ ଭାଟ ଲଗାଇବା ଦ୍ୱାରା ଏଠାରେ ମହାରାଷ୍ଟ୍ର ଅପେକ୍ଷା ପେଟ୍ରୋଲ ଡିଜେଲର ମୂଲ୍ୟ ଅଧିକ ରହିଛି। ଫଳରେ ଗାଡ଼ି ଚାଳକ ମଧ୍ୟପ୍ରଦେଶ ସୀମାରେ ପେଟ୍ରୋଲ, ଡିଜେଲ ପକାଇବା ଅପେକ୍ଷା ମହାରାଷ୍ଟ୍ରରେ ଭର୍ତ୍ତି କରିବା ଉଚିତ ମଣୁଛନ୍ତି। ଏହାକୁ ଦୃଷ୍ଟିରେ ରଖି ସମ୍ପୃକ୍ତ ପେଟ୍ରୋଲ ପମ୍ପ ମାଲିକ ପେଟ୍ରୋଲ ଡିଜେଲ ପକାଉଥିବା ଗ୍ରାହକଙ୍କୁ ଚା’ ଓ ଭୋଜନ ମାଗଣା ଦେବାର ସ୍କିମ ଆରମ୍ଭ କରିଛନ୍ତି।
