ଦିଲଜିତ୍‌ ଦୋସାଞ୍ଝଙ୍କୁ ଝଟ୍‌କା; ଗାୟକଙ୍କୁ ଲିଗାଲ୍‌ ନୋଟିସ୍‌ ପଠାଇଲେ ମହିଳା ପ୍ରଶଂସକ

ସମାଜ ଡଜିଟାଲ ଡେସ୍କ: ଗୀତ ଏବଂ ଅଭିନୟ ମାଧ୍ୟମରେ କୋଟି କୋଟି ଲୋକଙ୍କ ହୃଦୟରେ ଏକ ସ୍ଵତନ୍ତ୍ର ସ୍ଥାନ ଅଧିକାର କରିଥିବା ଦିଲଜିତ ଦୋସାଞ୍ଝ ଏବେ ତାଙ୍କ ଦିଲ୍-ଲୁମିନାଟି କନ୍‌ସର୍ଟକୁ ନେଇ ଚର୍ଚ୍ଚାରେ। ଦିଲ୍ଲୀରେ ଆୟୋଜିତ ହେବାକୁ ଥିବା ଏହି ଶୋ’ର ଟିକେଟ୍ ମୂଲ୍ୟ ବହୁତ ଅଧିକ, ଯେଉଁଥିପାଇଁ ପ୍ରଶଂସକଙ୍କ ମଧ୍ୟରେ ନିରାଶା ଦେଖାଦେଇଛି। ଏବେ କନସର୍ଟ ବିଷୟରେ ଏକ ବଡ଼ ଖବର ସାମ୍ନାକୁ ଆସିଛି।

ଗଣମାଧ୍ୟମ ରିପୋର୍ଟ ଅନୁସାରେ, ଦିଲ୍-ଲୁମିନାଟି କନ୍‌ସର୍ଟ ପାଇଁ ଟିକେଟ୍ ମୂଲ୍ୟ ହେରଫେର କରିବା ଅଭିଯୋଗରେ ଦିଲଜିତଙ୍କୁ ଆଇନଗତ ନୋଟିସ୍ ପଠାଯାଇଛି। ଦିଲ୍ଲୀର ଜଣେ ଆଇନ ଛାତ୍ରୀ ଟିକେଟ୍ କିଣିବାକୁ ଅସମର୍ଥ ହେବା ପରେ ଗାୟକଙ୍କୁ ଏକ ଆଇନଗତ ନୋଟିସ୍ ପଠାଇଛନ୍ତି। ସେ ଅଭିଯୋଗ କରିଛନ୍ତି ଯେ, ଆୟୋଜକମାନେ ଟିକେଟ୍ ଉପଲବ୍ଧତାରେ ଗଡ଼ବଡ଼ କରିଛନ୍ତି, ଯେଉଁଥିପାଇଁ ଟିକେଟ୍ ମୂଲ୍ୟରେ ମଧ୍ୟ ହେରଫେର ହୋଇଛି ଏବଂ ଏହାର ଦାମ୍ ବଢାଇ ଦିଆଯାଇଛି।

ଛାତ୍ରୀ ଜଣକ ଅଭିଯୋଗ କରିଛନ୍ତି ଯେ, ପାସ୍‌ ପାଇଁ ସେପ୍ଟେମ୍ବର ୧୨ ଦିନ ୧ଟା ପାଇଁ ସମୟ ଧାର୍ଯ୍ୟ କରାଯାଇଥିଲା, କିନ୍ତୁ ପାସ୍‌ଗୁଡ଼ିକୁ ଗୋଟିଏ ମିନିଟ୍ ପୂର୍ବରୁ ବିକ୍ରୟ ପାଇଁ ଉପଲବ୍ଧ କରାଯାଇଥିଲା ଏବଂ ପ୍ରାୟ ତୁରନ୍ତ ବିକ୍ରି ହୋଇଯାଇଥିଲା। ଛାତ୍ରୀ ଏହା ମଧ୍ୟ କହିଛନ୍ତି ଯେ, ସେ ବିଶେଷ କରି ଅର୍ଲି ବର୍ଡ ପାସ୍ ପାଇଁ ଏକ ଏଚଡିଏଫସି କ୍ରେଡିଟ୍ କାର୍ଡ କିଣିଥିଲେ, କିନ୍ତୁ ତଥାପି ସେ ଟିକେଟ ପାଇବାରେ ବିଫଳ ହୋଇଛନ୍ତି। ଦିଲଜିତଙ୍କ ବ୍ୟତୀତ ଏହି ନୋଟିସ୍ ଅନ୍ୟ ପକ୍ଷଙ୍କୁ ମଧ୍ୟ ପଠାଯାଇଛି। ଏଠାରେ ସୂଚନାଯୋଗ୍ୟ, ଦିଲଜିତ ଦୋସାଞ୍ଝ ବର୍ତ୍ତମାନ ୟୁରୋପରେ ଅଛନ୍ତି। ସେ ଅକ୍ଟୋବରରେ ଭାରତ ଆସିବେ ଏବଂ ୧୦ଟି ସହରରେ ଶୋ’ କରିବେ।