ନୂଆଦିଲ୍ଲୀ: କୃଷି ଆଇନ ବିରୋଧରେ ଚାଷୀମାନଙ୍କ ଆନ୍ଦୋଳନ ରବିବାର ୬୦ ଦିନରେ ପହଞ୍ଚିଥିଲେ ହେଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସେମାନଙ୍କ ଦାବି ଶୁଣୁ ନାହାନ୍ତି। ତେଣୁ ପ୍ରଧାନମନ୍ତ୍ରୀଙ୍କୁ ବୁଝାଇବା ପାଇଁ ଜଣେ ଚାଷୀ ତାଙ୍କ ମା’ ହୀରାବେନ ମୋଦୀଙ୍କୁ ଏକ ଅବେଗଭରା ଚିଠି ଲେଖିଛନ୍ତି। ୩ଟି ଯାକ କୃଷି ଆଇନ ପ୍ରତ୍ୟାହାର କରିବା ଲାଗି ତାଙ୍କ ପୁଅକୁ ବୁଝାଇବା ପାଇଁ ପଞ୍ଜାବର ଫିରୋଜପୁର ଅଞ୍ଚଳର ଏହି ଚାଷୀ ଜଣକ ହୀରାବେନଙ୍କୁ ଅନୁରୋଧ କରିଛନ୍ତି।
ହୀରାବେନ୍ଙ୍କୁ ଚିଠି ଲେଖିଥିବା ଚାଷୀଙ୍କ ନାମ ହେଉଛି ହରପ୍ରୀତ୍ ସିଂହ। ହୀରାବେନ୍ଙ୍କ ଉଦ୍ଦେଶ୍ୟରେ ସେ ଲେଖିଛନ୍ତି, ମୁଁ ମୋ ଗଭୀର ହୃଦୟରୁ ଏହି ଚିଠି ଲେଖୁଛି। ଆପଣ ଜାଣିଛନ୍ତି ଯେ, ୩ଟି କଳା ଆଇନ ଯୋଗୁ ସାରା ଦେଶ ଓ ବିଶ୍ଵକୁ ଖାଦ୍ୟ ଯୋଗାଉଥିବା ଅନ୍ନଦାତାମାନେ ଦିଲ୍ଲୀର ରାଜରାସ୍ତାରେ ପ୍ରବଳ ଥଣ୍ଡାରେ ଶୋଇବାକୁ ବାଧ୍ୟ ହୋଇଛନ୍ତି। ସେମାନଙ୍କ ମଧ୍ୟରେ ୯୦/୯୫ ବର୍ଷୀୟ ବୃଦ୍ଧ, ଶିଶୁ ଏବଂ ମହିଳା ଅଛନ୍ତି। ଥଣ୍ଡା ପାଗ ଯୋଗୁ ଆନ୍ଦୋଳନକାରୀ ଅସୁସ୍ଥ ହୋଇପଡ଼ୁଛନ୍ତି। ସେମାନଙ୍କ ମଧ୍ୟରୁ ଅନେକଙ୍କ ମୃତ୍ୟୁ ଘଟିଲାଣି, ଯାହା ଆମମାନଙ୍କ ପାଇଁ ଚିନ୍ତାର ବିଷୟ।
ହରପ୍ରୀତ୍ ମାସାଧିକ କାଳ ଯାଏ ଦିଲ୍ଲୀ ସୀମାରେ ଆନ୍ଦୋଳନ କରୁଛନ୍ତି। ସିମ୍ଲାରେ କିଛି ଦିନ ତଳେ ବିନା ଅନୁମତିରେ ବିକ୍ଷୋଭ ପ୍ରଦର୍ଶନ କରି ସେ ଗିରଫ ହୋଇଥିଲେ। ଦିନକ ପରେ ଜାମିନରେ ଆସି ପୁଣି ଆନ୍ଦୋଳନରେ ଯୋଗଦେଇଛନ୍ତି। ୧୦୦ ବର୍ଷୀୟା ହୀରାବେନ ତାଙ୍କ ପୁଅ ତଥା ପ୍ରଧାନମନ୍ତ୍ରୀ ମୋଦୀଙ୍କୁ ଆଇନ ପ୍ରତ୍ୟାହାର କରିବା ଲାଗି ବୁଝାଇବା ପାଇଁ ହରପ୍ରୀତ୍ ନିବେଦନ କରିଛନ୍ତି।
Comments are closed.