ନୂଆଦିଲ୍ଲୀ : ଇଲେକ୍ଟ୍ରିକ୍ ଦୁଇଚକିଆ ଯାନ ନିର୍ମାତା କମ୍ପାନୀ ମ୍ୟାଟର ଭାରତୀୟ ବଜାରରେ ନୂଆ ବାଇକ୍ ମ୍ୟାଟର ଏରା ଲଞ୍ଚ୍ କରିଦେଇଛି । କମ୍ପାନୀ ଏହି ବାଇକରେ ଅନେକ ଦମଦାର ଫିଚର୍ସ ଦେଇଛି । ଏହାର ଏକ୍ସ-ଶୋରୁମ୍ ଦାମ୍ ୧.୯୪ ଲକ୍ଷ ଟଙ୍କା ରହିଛି । ଅନଲାଇନରେ ଏହାକୁ ବୁକ୍ କରିପାରିବେ ଗ୍ରାହକ । ବାଇକ ସହିତ କମ୍ପାନୀ ତରଫରୁ ୩ ବର୍ଷ ବା ୧ ଲକ୍ଷ କିଲୋମିଟରର ଓ୍ବାରେଣ୍ଟି ପ୍ରଦାନ କରାଯାଉଛି ।
ଏରାର ଏକ ମୁଖ୍ୟ ଫିଚର୍ସରେ ଏହାର ହାଇପରସିଫ୍ଟ ଟ୍ରାନ୍ସମିଶନ ରହିଛି । ଏଥିରେ ୪ ସ୍ପିଡ୍ ମାନୁଆଲ୍ ଗିୟରବକ୍ସ ରହିଛି । ଏହି ସିଷ୍ଟମକୁ ୩ଟି ରାଇଡ୍ ମୋଡ୍ ସହିତ ଯୋଡାଯାଇଛି । କମ୍ପାନୀ ଏଥିରେ ଦମଦାର ବ୍ୟାଟେରୀ ଓ ମୋଟର ଦେଇଛି । ବାଇକରେ ଓ୍ବାଟରପ୍ରୁଫ୍ ବ୍ୟାଟେରୀ ରହିଛି ଯାହା ଫୁଲ୍ ଚାର୍ଜରେ ୧୭୨ କିଲୋମିଟର ପର୍ଯ୍ୟନ୍ତ ଯାତ୍ରା କରିପାରିବ । ବାଇକରେ ଥିବା ମୋଟର ମାତ୍ର ୨.୮ ସେକେଣ୍ଡରେ ଶୂନ୍ୟରୁ ୪୦ କିଲୋମିଟର ପ୍ରତି ଘଣ୍ଟା ସ୍ପିଡ୍ ଧରିପାରିବ । କମ୍ପାନୀ ସୂଚନା ଅନୁସାରେ ବାଇକକୁ ମାତ୍ର ୨୫ ପଇସା ପ୍ରତି କିଲୋମିଟର ଖର୍ଚ୍ଚରେ ଚଳାଇହେବ ।
ଏଥିରେ ୭ ଇଞ୍ଚର ଏକ ଟଚସ୍କ୍ରିନ୍ ଦିଆଯାଇଛି । ଏଥିରେ ନେଭିଗେସନ, ରାଇଡ୍ ଡାଟା, ମ୍ୟୁଜିକ୍ କଣ୍ଟ୍ରୋଲ ଭଳି ଫିଚର୍ ଦିଆଯାଇଛି । ଏଥିରେ ଓଟିଏ ଅପଡେଟ୍ ମଧ୍ୟ ଦିଆଯାଇଛି । ବାଇକରେ ଡୁଆଲ ଡିସ୍କ ବ୍ରେକ୍, ଏବିଏସ୍, ଡୁଆଲ ସସପେନ୍ସନ ସିଷ୍ଟମ, ସ୍ମାର୍ଟ ପାର୍କ ଆସିଷ୍ଟ ଭଳି ଫିଚର୍ସ ମଧ୍ୟ ଦିଆଯାଇଛି । ବାଇକରେ କି-ଲେସ୍ ଏଣ୍ଟ୍ରି, ରିମୋଟ୍ ଲକ୍/ଅନଲକ୍, ଲାଇଭ୍ ଲୋକେସନ୍ ମ୍ୟାଟର ଆପ୍ ଜରିଆରେ ପ୍ରଦାନ କରାଯାଉଛି ।
