ଫୁଲବାଣୀ: କନ୍ଧମାଳ ଜିଲା ଗୋଛଡ଼ା ଥାନା ଅନ୍ତର୍ଗତ କୋଲମପଡ଼ା ଗାଁ ନିକଟ ଜଙ୍ଗଲରେ ଯବାନ ଏବଂ ମାଓବାଦୀଙ୍କ ମଧ୍ୟରେ ଗୁଳିବିନିମୟ ଘଟିଛି। ଏହି ଗୁଳିବିନିମୟ ସମୟରେ ମାଓବାଦୀମାନେ ଯବାନଙ୍କୁ ସାମ୍ନା କରି ନ ପାରି ଘଟଣାସ୍ଥଳରୁ ଛତ୍ରଭଙ୍ଗ ଦେଇଛନ୍ତି।
ଗତ ସୋମବାର ଭୋର ସମୟରେ ଏହି ଗୁଳିବିନିମୟ ଘଟିଥିଲା। ବିଶ୍ଵସ୍ତ ସୂତ୍ରରୁ ସୂଚନା ମିଳିବା ପରେ ଏସଓଜି ଏବଂ କନ୍ଧମାଳ ଡିଭିଏଫ ପକ୍ଷରୁ ଗତ ୪ ତାରିଖରେ କୋଲମପଡ଼ା ଜଙ୍ଗଲରେ କୋମ୍ବିଂ ଅପରେଶନ ଆରମ୍ଭ ହୋଇଥିଲା। ୫ ତାରିଖ ସକାଳେ ଯବାନଙ୍କ ସହିତ ମାଓବାଦୀଙ୍କ ମୁହାଁମୁହିଁ ହୋଇଥିଲା। ମାଓବାଦୀମାନେ ଯବାନମାନଙ୍କ ଉପରକୁ ପ୍ରଥମେ ଗୁଳି ଚଳାଇଥିଲେ। ଯବାନମାନେ ସେମାନଙ୍କୁ କଡ଼ା ଜବାବ ଦେଇଥିଲେ। ଫଳରେ ମାଓବାଦୀମାନେ ଘଟଣାସ୍ଥଳରୁ ଛତ୍ରଭଙ୍ଗ ଦେଇଥିଲେ। ପୁଲିସ ଘଟଣା ସ୍ଥଳରୁ ମାଓବାଦୀଙ୍କ ଦ୍ବାରା ବ୍ୟବହୃତ ବିଭିନ୍ନ ସାମଗ୍ରୀ ଜବତ କରିଛି। ଜଙ୍ଗଲରେ ଏବେ ବି କୋମ୍ବିଂ ଅପରେଶନ ଜାରି ରହିଥିବା ସୂଚନା ମିଳିଛି।
