ପାଟଣା: ପାଟଣା ବନାଞ୍ଚଳରେ ୨୯ ଟିକିଆ ହାତୀ ପଲଙ୍କ ଉପଦ୍ରବ ଜାରି ରହିଛି। ଶୁକବ୍ରାର ବିଳମ୍ବିତ ରାତିରେ ସଦର ବ୍ଲକ କାଠ ବାରି ପଞ୍ଚାୟତ ଯମୁନା ପଶିରେ ଏକାଥରେ ୧୦ ଜଣଙ୍କର ଘର କାନ୍ଥ ଭାଙ୍ଗି ଦେଇଛନ୍ତି ହାତୀ ପଲ।
ସୂଚନା ଅନୁସାରେ, ହାତୀପଲ ଧନୁର୍ଜୟପୁର ଯମୁନାପଶି ଗ୍ରାମର ମଞ୍ଜୁ ନାଏକ ଏବଂ ଦୁର୍ଯେ୍ୟାଧନ ମହାରଣାଙ୍କ ଘର ଭାଙ୍ଗି ଦେଇଛନ୍ତି। ସେହିପରି ନିତ୍ୟାନନ୍ଦ ମହାରଣାଙ୍କ ଘର କାନ୍ଥ କଣା କରି ଚାଉଳ ଖାଇ ଯାଇଛନ୍ତି। ଏହାବ୍ୟତୀତ ବିଷିକେଶନ ମହାକୁଡ, କେଶବ ମହାରଣା, ସମରା ମହାରଣା, ନିର ମହାରଣାଙ୍କ ଘର କାନ୍ଥ ଭାଙ୍ଗିଛନ୍ତି। ଶରତ ନାଏକଙ୍କ ଟାଇଲ୍ ଘରର କାନ୍ଥ କଣା କରି ଧାନ ଚାଉଳ ଖାଇବା ପରେ ବିଦେଶୀ ମହାରଣା, ଚମ୍ପା ନାଏକଙ୍କ ଘର ଭାଙ୍ଗିଛନ୍ତି ହାତୀପଲ। ଛକରେ ଥିବା ଏକ ଦୋକାନ ଘରକୁ ମଧ୍ୟ ଭାଙ୍ଗି ସଂପୂର୍ଣ୍ଣ ନଷ୍ଟ କରି ଦେଇଛନ୍ତି। କ୍ଷତିଗ୍ରସ୍ତ ଲୋକଙ୍କୁ କ୍ଷତିପୂରଣ ଯୋଗାଇଦେବା ସହିତ ହାତୀମାନଙ୍କୁ ଶୀଘ୍ର ଅଞ୍ଚଳରୁ ଘଉଡ଼ାଇବା ପାଇଁ ଗ୍ରାମବାସୀ ଦାବି କରିଛନ୍ତି। ହାତୀ ପଲ ଉପରେ ବନବିଭାଗ ପକ୍ଷରୁ ନଜର ରଖାଯାଇଥିବା କୁହାଯାଇଛି।
