ସୁନ୍ଦରଗଡ଼: ତୃଣମୂଳସ୍ତରରୁ ଶିକ୍ଷା ବ୍ୟବସ୍ଥାରେ ସୁଧାର ଆଣିବା ସହ ଛାତ୍ରଛାତ୍ରୀଙ୍କୁ ଗୁଣାତ୍ମକ ଶିକ୍ଷା ପ୍ରଦାନ କରିବା ପାଇଁ କେନ୍ଦ୍ର ମାନବ ସମ୍ବଳ ବିଭାଗ ଓ ନୀତି ଆୟୋଗ ବିଭିନ୍ନ ପ୍ରକାର କାର୍ଯ୍ୟକ୍ରମ ଓ ଯୋଜନାମାନ ପ୍ରସ୍ତୁତ କରି ଆସୁଛନ୍ତି। ଏପରିକି ଏହି କାର୍ଯ୍ୟକ୍ରମ ଓ ଯୋଜନା ଗୁଡ଼ିକର ସଫଳ ରୂପାୟନ ପାଇଁ ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ବିଭାଗ ସହ ନିରନ୍ତର ସଂପର୍କ ରଖାଯାଇ ଏହାର ସମୀକ୍ଷା କରାଯାଉଛି। ଏହିକ୍ରମରେ ନୀତି ଆୟୋଗ ଦ୍ୱାରା ପରିଚାଳିତ “ସାଥ’ କାର୍ଯ୍ୟକ୍ରମ ଦ୍ୱାରା ନିର୍ଦ୍ଧାରିତ ୪୦ଟି ସୂଚକାଙ୍କ(ପାରାମିଟର)କୁ ନେଇ ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ବିଭାଗ ମଧ୍ୟ ବିଭିନ୍ନ ବିଦ୍ୟାଳୟର ଭିତ୍ତିଭୂମି ସମେତ ଶିକ୍ଷାଦାନ, ଛାତ୍ରଛାତ୍ରୀଙ୍କ ପାସ ହାର ଓ ଦକ୍ଷତା, ବିଭିନ୍ନ ଯୋଜନାରେ ଛାତ୍ରଛାତ୍ରୀଙ୍କ ଉପରେ ପ୍ରଭାବ ଓ ଗ୍ରହଣୀୟତାକୁ ନେଇ ଏକ ମୂଲ୍ୟାଙ୍କନ ରାଜ୍ୟସ୍ତରରେ ଅନୁଷ୍ଠିତ ହୋଇଯାଇଛି। ଗତ ଡ଼ିସେମ୍ବର ମାସରେ ରାଜ୍ୟର ୩୦ଟି ଜିଲା ଓ ୩୧୪ ବ୍ଲକର ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟରେ ଅଧ୍ୟୟନ କରୁଥିବା ଛାତ୍ରଛାତ୍ରୀ ମାନଙ୍କ ଶୈକ୍ଷିକ ସ୍ଥିତି, ବିଦ୍ୟାଳୟ ଗୁଡ଼ିକର ଭିତ୍ତିଭୂମି ଓ ବିଭିନ୍ନ ସରକାରୀ ନିର୍ଦ୍ଦେଶନାମାକୁ ତୃଣମୂଳସ୍ତରରେ କାର୍ଯ୍ୟକାରୀ କରିବା କ୍ଷେତ୍ରରେ ସୁନ୍ଦରଗଡ଼ ଜିଲା ସମଗ୍ର ରାଜ୍ୟରେ ୯୧.୬୯ ପ୍ରତିଶତ ରଖି ସର୍ବାଗ୍ରେ ରହିଥିବା ବେଳେ ପଡ଼ୋଶୀ ଜିଲା ଝାରସୁଗୁଡ଼ା ୮୭.୧ ଓ ସମ୍ବଲପୁର ୮୩.୯୨ ପ୍ରତିଶତ ପାଇଥିବାର ଜଣାପଡ଼ିଛି। ସେହିପରି ରାଜ୍ୟର ୩୧୪ ବ୍ଲକ ମଧ୍ୟରୁ ସବଡ଼େଗା ବ୍ଲକ ପ୍ରଥମ ସ୍ଥାନ ଅଧିକାର କରିଥିବାର ଜଣାପଡ଼ିଛି। ଏହି ସଫଳତା ପାଇଁ ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ବିଭାଗ ଜିଲା ଶିକ୍ଷା ଅଧିକାରୀ ରଞ୍ଜନ କୁମାର ଗିରି ଓ ସବଡ଼େଗା ବ୍ଲକ ଶିକ୍ଷା ଅଧିକାରୀ ଅଜୟ ଏକ୍କାଙ୍କୁ ଶୁଭେଚ୍ଛା ଜଣାଇଥିବା ଜଣାପଡ଼ିଛି। ଅପରପକ୍ଷରେ ଏ ଖବର ସୋସିଆଲ ମିଡ଼ିଆରେ ଜଣାପଡ଼ିବା ପରେ ଜିଲାର ଶିକ୍ଷକ, ସଚେତନ ନାଗରିକ, ଅଭିଭାବକଙ୍କ ମହଲରେ ମଧ୍ୟ ଆନନ୍ଦ ଖେଳିଯାଇଛି । ସୁନ୍ଦରଗଡ଼ ଜିଲା ପ୍ରାଥମିକ ଶିକ୍ଷକ ସଂଘର ସଭାନେତ୍ରୀ ମମତା କର, ସାଧାରଣ ସଂପାଦକ ଗୋବିନ୍ଦ ଚନ୍ଦ୍ର ସୁଆର ଓ ଜିଲା ପରିଷଦ ଶିକ୍ଷକ ନେତା ହୋତେଶ୍ୱର ଶେଖର ଦେଓ ପ୍ରମୁଖ ଜିଲା ଶିକ୍ଷା ଅଧିକାରୀ ଓ ତାଙ୍କ ଟିମକୁ ଅଭିନନ୍ଦନ ଜଣାଇଛନ୍ତି।
Popular Categories
Previous article
Next article