ଭୁବନେଶ୍ବର: ଟୋକିଓ ଅଲିମ୍ପିକ୍ସରେ ଧାବିକା ଦୂତିଚାନ୍ଦଙ୍କ ନୈରାଶ୍ୟଜନକ ପ୍ରଦର୍ଶନକୁ ନେଇ ତାଙ୍କ ବିରୋଧରେ ନକାରାତ୍ମକ ଖବର ପ୍ରସାରଣ କରାଯାଇଥିଲା। ଏନେଇ ଗତ ବୁଧବାର ଦୂତି ଚାନ୍ଦ ମହିଳା ଥାନାରେ ଅଭିଯୋଗ କରିଥିଲେ। ଏହି ଅଭିଯୋଗକୁ ଭିତ୍ତିକରି ମହିଳା ଥାନା ପୁଲିସ ଏକ ମାମଲା ରୁଜୁ କରି ଖବର ପ୍ରସାରଣ କରିଥିବା ୱେବ୍ପୋର୍ଟାଲର ସମ୍ପାଦକ ସୁଧାଂଶୁ ରାଉତ ଏବଂ ସେହି ସଂସ୍ଥାର ସାମ୍ବାଦିକ ସ୍ମୃତିରଞ୍ଜନ ବେହେରାଙ୍କୁ ଥାନାକୁ ଆଣି ପଚରାଉଚରା କରୁଛି। ଶୁକ୍ରବାର ଅପରାହ୍ଣରେ କମିସନରେଟ୍ ପୁଲିସର ଏକ ଦଳ ଝାରପଡ଼ାସ୍ଥିତ ଫୋକସ୍ ଓଡ଼ିଶା ନାମକ ୱେବ୍ପୋର୍ଟାଲ୍ କାର୍ଯ୍ୟାଳୟରେ ଚଢ଼ଉ କରିଥିଲା। ସମ୍ପାଦକ ଏବଂ ସାମ୍ବାଦିକଙ୍କୁ ଆଣି ପୁଲିସ ଜେରା କରୁଛି।
ସେହିପରି ଦୂତି ମଧ୍ୟ ଥାନାକୁ ଆସି ତାଙ୍କ ପାଖରେ ଥିବା ପ୍ରମାଣ ଦେଇଥିଲେ। ପୁଲିସ ସନ୍ଧ୍ୟା ପର୍ଯ୍ୟନ୍ତ ଉଭୟ ପକ୍ଷଙ୍କୁ ଥାନାରେ ପଚରାଉଚରା କରୁଥିବା ଜଣାପଡ଼ିଛି। ଦୂତିଙ୍କ ଅଭିଯୋଗ ଆଧାରରେ ମହିଳା ଥାନା ପୁଲିସ ଅଶାଳୀନ ମନ୍ତବ୍ୟ ଦେଇ ନିର୍ଯାତନା ଦେବା ଏବଂ ତାଙ୍କୁ ଭୟଭୀତ କରି ଟଙ୍କା ଆଦାୟ ଲାଗି ପ୍ରୟାସ କରାଯିବା ଓ ଧମକ ଦେବା ଭଳି ମାମଲା ରୁଜୁ କରିଛି। ଜଣେ ସୂଚନା ଅଧିକାର କର୍ମୀଙ୍କ ବିରୋଧରେ ମଧ୍ୟ ଦୂତି ଅଭିଯୋଗରେ ନାମ ଉଲ୍ଲେଖ କରିଥିଲେ।
