ନୂଆଦିଲ୍ଲୀ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ-ୟୁକ୍ରେନ ଯୁଦ୍ଧ ଉପରେ ପୁଣି ଥରେ ନିଜର ମତ ସାମ୍ନାକୁ ଆଣିଛନ୍ତି । ଏହାସହ ୟୁରୋପକୁ ମଧ୍ୟ ଚେତାବନୀ ଦେଇଛନ୍ତି ଯେ, ରୁଷରୁ ତେଲ ନ କିଣିବାକୁ ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷରୁ ତେଲ କିଣିବା ଦେଶମାନଙ୍କ ଉପରେ କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ମଙ୍ଗଳବାର ଦିନ ଟ୍ରମ୍ପ ୟୁରୋପକୁ ଏକ ଚେତାବନୀ ଦେଇ କହିଛନ୍ତି, ୟୁକ୍ରେନରେ ସଂଘର୍ଷ ପାଇଁ ମସ୍କୋର ଆର୍ଥିକ ସହାୟତା ବନ୍ଦ କରିବା ପାଇଁ ୟୁରୋପ ତୁରନ୍ତ ରୁଷ ତେଲ କିଣିବା ବନ୍ଦ କରିବା ଉଚିତ। ସେ କହିଛନ୍ତି, ୟୁରୋପ ମୋର ବନ୍ଧୁ, କିନ୍ତୁ ୟୁରୋପ ରୁଷରୁ ତେଲ କିଣୁଛି। ମୁଁ ଚାହୁଁନାହିଁ ଯେ ସେମାନେ ତେଲ କିଣନ୍ତୁ। ସେମାନେ ଯେଉଁ କଟକଣା ଲଗାଉଛନ୍ତି ତାହା ଯଥେଷ୍ଟ କଠୋର ନୁହେଁ।
ସାମ୍ବାଦିକମାନଙ୍କ ସହ କଥାବାର୍ତ୍ତା କରି ଟ୍ରମ୍ପ କହିଛନ୍ତି ଯେ ୟୁକ୍ରେନ ରାଷ୍ଟ୍ରପତି ଜେଲେନସ୍କିଙ୍କୁ ଚାଲିଥିବା ସଂଘର୍ଷର ଅନ୍ତ ପାଇଁ ଏକ ଆପୋଷ ସମାଧାନ କରିବା ଉଚିତ। ସେ କହିଛନ୍ତି, ଜେଲେନସ୍କି ଆଗକୁ ବଢ଼ି ଏକ ଆପୋଷ ସମାଧାନ କରିବାକୁ ପଡିବ। ୟୁରୋପକୁ ରୁଷରୁ ତେଲ କିଣିବା ବନ୍ଦ କରିବାକୁ ପଡିବ। ସେମାନଙ୍କୁ ରୁଷରୁ ତେଲ କିଣିବା ବନ୍ଦ କରିବାକୁ ପଡିବ।
ସାମ୍ବାଦିକ ସମ୍ମିଳନୀରେ ପଚରାଯାଇଥିବା ପ୍ରଶ୍ନର ଉତ୍ତର ଦେଇ ଟ୍ରମ୍ପ କହିଛନ୍ତି ଯେ, ଆମଦାନୀ ବନ୍ଦ କରିବା ପାଇଁ ୟୁରୋପୀୟ ଏବଂ ନାଟୋ ଦେଶଗୁଡ଼ିକୁ ଚାପ ପକାଉଛନ୍ତି । ଟ୍ରମ୍ପ ଆହୁରି ମଧ୍ୟ କହିଛନ୍ତି, ସେମାନେ ରୁଷୀୟ ତେଲ କିଣୁଛନ୍ତି। ସେ କହିଲେ ଯେ ସେ ଚାହାଁନ୍ତି ନାହିଁ ଯେ ସେହି ଦେଶଗୁଡ଼ିକ ରୁଷୀୟ ତେଲ କିଣନ୍ତୁ, ଏବଂ ସେମାନଙ୍କୁ ତୁରନ୍ତ ଏହାକୁ ବନ୍ଦ କରିବା ଆବଶ୍ୟକ। ଏହା ଆମ ପ୍ରତି ନ୍ୟାୟପୂର୍ଣ୍ଣ ନୁହେଁ।
