ସମାଜ ଡିଜିଟାଲ ଡେସ୍କ: ଦେଶରେ ବଢୁଥିବା ସାଇବର ଅପରାଧକୁ ରୋକିବା ପାଇଁ ଦୂରସଂଚାର ବିଭାଗ ପକ୍ଷରୁ ୩୯୨ଟି ମୋବାଇଲ୍ ହ୍ୟାଣ୍ଡସେଟ୍ କୁ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି। ଏହି ହ୍ୟାଣ୍ଡସେଟ୍ ଗୁଡିକ ବିଦ୍ୟୁତ୍ କେୱାଇସି ଅପଡେଟ୍ ସ୍କାମରେ ବ୍ୟବହୃତ ହେଉଥିବା ଚିହ୍ନଟ କରାଯାଇଥିଲା। ଏହି ସ୍କାମରେ ସାଇବର ଠକମାନେ ବିଦ୍ୟୁତ୍ ବିଭାଗର ଅଧିକାରୀ ଭାବରେ ନିଜକୁ ପରିଚୟ ଦେଇ ଏସଏମଏସ ଓ ହ୍ୱାଟସ୍ ଆପ୍ ମାଧ୍ୟମରେ ଯୋଗାଯୋଗ କରୁଛନ୍ତି। ଏହି ମେସେଜରେ ଉପଭୋକ୍ତାଙ୍କୁ ସେମାନଙ୍କର କେୱାଇସି ବିବରଣୀ ଅପଡେଟ୍ କରିବାକୁ କୁହାଯାଉଥିଲା। ଯଦି ଏହା ନକରିବେ ତେବେ ଘରୁ ବିଦ୍ୟୁତ କାଟ କରାଯିବ। ପଠାଯାଇଥିବା ଏହି ମେସେଜ ଗୁଡିକରେ ସାଧାରଣତଃ ଏକ ବିପଜ୍ଜନକ ଲିଙ୍କ ରହିଥାଏ। ଯେଉଁଥିରେ ବ୍ୟକ୍ତିଗତ ସୂଚନା ମାଗିଥାନ୍ତି। ଆପଣ ଯଦି ନିଜର ବ୍ୟକ୍ତିଗତ ତଥ୍ୟ ସେମାନଙ୍କୁ ପ୍ରଦାନ କରନ୍ତି ତେବେ ସାଇବର ଠକମାନେ ଏହାର ଅପବ୍ୟବହାର କରି ଆର୍ଥିକ ଠକେଇ କରିଥାନ୍ତି।
ଦୂରସଂଚାର ବିଭାଗର ‘ଚକ୍ଷୁ’ ପ୍ଲାଟଫର୍ମ ମାଧ୍ୟମରେ ଗ୍ରହଣ କରାଯାଇଥିବା ଅଭିଯୋଗ ବୃଦ୍ଧି ହେବା ପରେ ଏଭଳି ପଦକ୍ଷେପ ଗ୍ରହଣ କରାଯାଇଛି। ‘ଚକ୍ଷୁ’ ଏକ ସରକାରୀ ପଦକ୍ଷେପ ଯାହା ନାଗରିକମାନଙ୍କୁ ସନ୍ଦେହଜନକ ଯୋଗାଯୋଗ ସମ୍ପର୍କରେ ରିପୋର୍ଟ କରିବାକୁ ଅନୁମତି ଦେଇଥାଏ। ଏହି ରିପୋର୍ଟକୁ ଆଧାର କରି ଦୂରସଂଚାର ବିଭାଗ ସାଇବର ଠକେଇ କାର୍ଯ୍ୟକଳାପର ଏକ ନେଟୱର୍କ ଚିହ୍ନଟ କରିବା ପାଇଁ ‘ଚକ୍ଷୁ’ ପୋର୍ଟାଲରେ ଏଆଇ ଚାଳିତ ବିଶ୍ଳେଷଣ ବ୍ୟବହାର କରିଥିଲା। ଏଥିରୁ ଜଣାପଡିଛି ଯେ ୩୯୨ଟି ମୋବାଇଲ୍ ହ୍ୟାଣ୍ଡସେଟ୍ ଏବଂ ଏହି ସ୍କାମରେ ଜଡିତ ୩୧ହଜାର ୭୪୦ରୁ ଅଧିକ ମୋବାଇଲ୍ ନମ୍ବର ମଧ୍ୟରେ ଏକ ସଂଯୋଗ ରହିଛି। ଏହି ଅନୁସନ୍ଧାନକୁ ଭିତ୍ତି କରି ଦୂରସଂଚାର ବିଭାଗ ଟେଲିକମ୍ କମ୍ପାନୀଗୁଡିକୁ ଚିହ୍ନଟ ହୋଇଥିବା ମୋବାଇଲ୍ ନମ୍ବର ଏବଂ ହ୍ୟାଣ୍ଡସେଟ୍କୁ ସାରା ଦେଶରେ ବନ୍ଦ କରିବାକୁ ନିର୍ଦ୍ଦେଶ ଦେଇଛି।
Comments are closed.