ସମାଜ ଡିଜିଟାଲ ଡେସ୍କ: ବିମାନ ଚାଳନା ପ୍ରଶିକ୍ଷଣ ଦେଉଥିବା ଅଲକେମିଷ୍ଟ ଏଭିଏସନର ଲାଇସେନ୍ସ ବାତିଲ ହୋଇଛି। ଝାଡ଼ଖଣ୍ଡରେ ଗତ ଅଗଷ୍ଟ ୨୦ ତାରିଖରେ ପ୍ରଶିକ୍ଷଣ ପାଇଁ ଉଦ୍ଦିଷ୍ଟ ଏକ ଏୟାରକ୍ରାଫ୍ଟ ଦୁର୍ଘଟଣାଗ୍ରସ୍ତ ହୋଇ ୨ ଜଣ ପାଇଲଟଙ୍କ ମୃତ୍ୟୁ ଘଟିବା ପରେ ବେସାମରିକ ବିମାନ ଚଳାଚଳ ନିର୍ଦେଶାଳୟ(ଡିଜିସିଏ) ପକ୍ଷରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ବିମାନ ପ୍ରଶିକ୍ଷଣ ସଂଗଠନ(ଏଫଟିଓ) ଭାବେ ଅଲକେମିଷ୍ଟ ଏଭିଏସନ ପ୍ରାଇଭେଟ ଲିମିଟେଡ୍କୁ ଦିଆଯାଇଥିବା ଅନୁମତି ରଦ୍ଦ କରାଯାଉଛି ବୋଲି ଡିଜିସିଏ ପକ୍ଷରୁ କୁହାଯାଇଛି।
ଗତ ଅଗଷ୍ଟ ୨୦ରେ ସଂସ୍ଥାର ଏକ ଟ୍ରେନି ଏୟାରକ୍ରାଫ୍ଟ (ପ୍ରଶିକ୍ଷଣ ପାଇଁ ଉଦ୍ଦିଷ୍ଟ ବିମାନ) ଜାମଶେଦପୁର ସୋନାରି ବିମାନବନ୍ଦର ଅଞ୍ଚଳରେ ଉଡ଼ାଣ କରୁଥିଲା। ଏଥିରେ ଜଣେ ଶିକ୍ଷାନବିସ ପାଇଲଟ ଏବଂ ଜଣେ ପ୍ରଶିକ୍ଷକ ଥିଲେ। କିନ୍ତୁ ଉଡ଼ାଣ ସମୟରେ ବିମାନଟି ଦୁର୍ଘଟଣାଗ୍ରସ୍ତ ହେବାରୁ ଉଭୟଙ୍କ ମୃତ୍ୟୁ ଘଟିଥିଲା। ଡିଜିସିଏ ପକ୍ଷରୁ ଏହି ଘଟଣାର ତଦନ୍ତ ସମୟରେ ସଂସ୍ଥା ଅନେକ ନିୟମ ଖିଲାପ କରୁଥିବା ସାମ୍ନାକୁ ଆସିଥିଲା।
