ଦେବଗଡ଼ : ବୁଧବାର ଅପରାହ୍ନରେ ରିଆମାଳ ଥାନା ତଥା କଂସର ଫାଣ୍ଡି ଅନ୍ତର୍ଗତ ଢୋଲପଡା ଗ୍ରାମରେ ବାଇକ ଦୁର୍ଘଟଣାରେ ୨ ଜଣ ଯୁବକ ଗୁରୁତର ହୋଇଛନ୍ତି । ମିଳିଥିବା ସୂଚନା ଅନୁଯାୟୀ ଅପରାହ୍ନ ପ୍ରାୟ ୪ ଟା ସମୟରେ କଂସର ଫାଣ୍ଡି ଅନ୍ତର୍ଗତ ହିରନ ଗ୍ରାମର ତପନ ଦେହୁରୀ ଓ ତାଙ୍କ ସମ୍ପର୍କୀୟ ଭାଇ ବାରୁ ଦେହୁରୀ କୌଣସି କାମରେ ଏକ ବାଇକ ଯୋଗେ ଦୁଧିଆନାଳି ଗ୍ରାମକୁ ଯାଉଥିଲେ ।
ଢୋଲପଡା ଗ୍ରାମ ନିକଟସ୍ଥ ଏକ ବୁଲାଣିରେ ଭାରସାମ୍ୟ ହରାଇ ବାଇକଟି ରସ୍ତା କଡରେ ଥିବା କଂକ୍ରିଟ ଖୁଣ୍ଟରେ ପିଟି ହୋଇଥିଲା । ଦୁଇ ଜଣ ରାସ୍ତାକୁ ଛିଟିକି ପଡି ଗୁରୁତର ହୋଇଥିଲେ । ଉଭୟଙ୍କୁ ଆମ୍ବୁଲାନ୍ସ ଯୋଗେ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି ।
