ଲାଞ୍ଜିଗଡ: ପେଟ ପୋଷିବାକୁ କାମ ଧନ୍ଦା କରିବାକୁ ଘର ଛାଡ଼ି ବର୍ଷକ ତଳେ ଦାଦନ ଖଟିବାକୁ ଯାଇଥିଲେ କଳାହାଣ୍ଡି ଜିଲ୍ଲା ଲାଞ୍ଜିଗଡ ବ୍ଲକ କିଡିଙ୍ଗ ଗାଁର ବୃହସ୍ପତି ଶବର (୨୮)। ଗୁଜରାଟ ରାଜ୍ୟର ଦ୍ଵାରିକା ନିକଟରେ ଏକ ନିର୍ମାଣାଧୀନ ପ୍ରକଳ୍ପରେ ସେ ଶ୍ରମିକ ଭାବେ କାମ କରୁଥିଲେ। ତେବେ ଶୁକ୍ରବାର ବିଳମ୍ବିତ ରାତିରେ ଦ୍ଵାରିକା ରେଳ ଷ୍ଟେସନ ନିକଟ ରେଳ ଧାରଣା ଉପରୁ ତାଙ୍କ ମୃତଦେହ ଉଦ୍ଧାର କରିଛି ରେଳବାଇ ପୁଲିସ। ମୃତଦେହ ଜବତ କରି ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଶନିବାର ଦିନ ମୃତଦେହ ବ୍ୟବଚ୍ଛେଦ ପରେ ଶବାଗାରରେ ଶବ ସଂରକ୍ଷିତ ରଖାଯାଇଛି। ପରିବାର ଲୋକେ ଅର୍ଥାଭାବ ଯୋଗୁ ସେଠାରୁ ମୃତଦେହ ଆଣି ଗାଁରେ ଦାହ ସଂସ୍କାର କରିବାକୁ ସକ୍ଷମ ନୁହଁନ୍ତି।
ଅପରପକ୍ଷରେ ପରିବାର ଲୋକଙ୍କ ଜିମାରେ ମୃତଦେହ ହସ୍ତାନ୍ତର କରିବା କିମ୍ବା ସେମାନଙ୍କ ଉପସ୍ଥିତିରେ ଶବ ସଂସ୍କାର କରାଯିବାକୁ ସେଠାକାର ପୁଲିସ ଅପେକ୍ଷା କରିଛି। ଏଥିଯୋଗୁ କାମ କରାଉଥିବା ଠିକାଦାର ବି ଅଡୁଆରେ ପଡିଛନ୍ତି। ଦ୍ୱାରିକାସ୍ଥିତ ଶବଗୃହରେ ଆଜିକୁ ତିନିଦିନ ହେଲା ମୃତଦେହ ପଡ଼ି ରହିଥିବାବେଳେ କଳାହାଣ୍ଡି ଜିଲ୍ଲା ପ୍ରଶାସନ, ଜିଲ୍ଲା ଶ୍ରମ ବିଭାଗ ଏଥିପ୍ରତି ଦୃଷ୍ଟି ଦେବା ସହିତ ସମ୍ମାନର ସହିତ ଶବ ସଂସ୍କାର ଓ କ୍ଷତିପୂରଣ ପ୍ରଦାନ କରିବାକୁ ଦାବି ହେଉଛି।
Comments are closed.