୯ ଦିନ ପରେ ମିଳିଲା ନିଖୋଜ ଯୁବକଙ୍କ ମୃତଦେହ ; ହତ୍ୟା ସନ୍ଦେହ

ନବରଙ୍ଗପୁର : ନବରଙ୍ଗପୁର ଝରିଗାଁ ବ୍ଲକ ଗୌଡସାହି ଗ୍ରାମର ନିଖୋଜ ଥିବା ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି। ଯୁବକ ଜଣକ ଗୌଡସାହି ଗ୍ରାମର ଅଭିଜିତ ମଣ୍ଡଳ। ଅଭିଜିତଙ୍କ ମୃତଦେହ ନିକଟରୁ ବାଇକ ଓ ମୋବାଇଲ ପୁଲିସ ଜବତ କରିଛି। ସେ ଗତ ୯ତାରିଖ ଦିନ କଂଗ୍ରେସ ରାଲିରେ ଯାଇ ଆଉ ଘରକୁ ଫେରି ନ ଥିଲେ। ତେବେ ଏ ନେଇ ପରିବାର ପକ୍ଷରୁ ୧୦ତାରିଖ ଦିନ ଝରିଗାଁ ଥାନାରେ ଏତଲା ଦିଆଯାଇଥିଲା। ୯ ଦିନ ଅର୍ଥାତ ବୁଧବାର ଦିନ ଅଭିଜିତଙ୍କ ମୃତଦେହ କୁସୁମପାଣି ଜଙ୍ଗଲରୁ ମିଳିଛି। ଏହା ଏକ ହତ୍ୟାକାଣ୍ଡ ବୋଲି ପୁଲିସ ପାରିପାର୍ଶିକ ସ୍ଥିତିରୁ ଅନୁମାନ କରୁଛି। ପୁଲିସ ଏହାକୁ ନେଇ ତଦନ୍ତ ଆରମ୍ଭ କରିଛି।

ସୂଚନାଯୋଗ୍ୟ ଯେ, ଗତ ୯ ତାରିଖ ଦିନ କଂଗ୍ରେସ ପକ୍ଷରୁ ଏକ ବାଇକ ରାଲି ଆୟୋଜିତ ହୋଇଥିଲା। ଅଭିଜିତ ବାଇକ ରାଲିରେ ଯିବେ ବୋଲି ଘରେ ନିଜ ମା’କୁ କହି ଝରିଗାଁ ଯାଇଥିଲେ। କିନ୍ତୁ ବାଇକ ରାଲି ସରିବା ପରେ ଅଭିଜିତ ଘରକୁ ଫେରି ନ ଥିଲେ। ପରିବାର ଲୋକ ତାଙ୍କୁ ଖୋଜିବା ପରେ ନ ପାଇ ୧୦ତାରିଖ ଦିନ ଝରିଗାଁ ଥାନାରେ ଏତଲା କରିଥିଲେ।