ନୂଆଦିଲ୍ଲୀ: ବିଶିଷ୍ଟ ବୌଦ୍ଧ ଧର୍ମଗୁରୁ ଦଲାଇ ଲାମା ଅସୁସ୍ଥ ହୋଇପଡ଼ିଛନ୍ତି। ତାଙ୍କ ଛାତିରେ ସଂକ୍ରମଣ ହୋଇଥିବା ଜଣାପଡ଼ିଛି। ଚିକିତ୍ସା ପାଇଁ ମଙ୍ଗଳବାର ତାଙ୍କୁ ଦିଲ୍ଲୀର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ଏହା ପୂର୍ବରୁ ମଧ୍ୟ ଦଲାଇ ଲାମା ଦିଲ୍ଲୀ ଆସି ନିଜର ଚିକିତ୍ସା କରାଇଥିଲେ। କୁହାଯାଉଛି ଯେ, ମଙ୍ଗଳବାର ହସ୍ପିଟାଲରେ ଭର୍ତ୍ତି ହେବା ପରେ ଡାକ୍ତରମାନେ ତାଙ୍କର କିଛି ପରୀକ୍ଷା କରିଛନ୍ତି, ଯାହାର ରିପୋର୍ଟ ଭଲ ଥିବା ସୂଚନା ମିଳିଛି।
ଦଲାଇ ଲାମାଙ୍କ ବ୍ୟକ୍ତିଗତ ସଚିବ ତେନଜିନ ଟକଲା କହିଛନ୍ତି ଯେ, ମଙ୍ଗଳବାର ଧର୍ମଗୁରୁଙ୍କ ସ୍ବାସ୍ଥ୍ୟ ଖରାପ ହୋଇଯାଇଥିଲା। ତାଙ୍କୁ ଦିଲ୍ଲୀର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ୨/୩ ଦିନ ପର୍ଯ୍ୟନ୍ତ ସେ ହସ୍ପିଟାଲରେ ରହି ଚିକିତ୍ସିତ ହେବ।
ସୂଚନାଯୋଗ୍ୟ, କିଛିଦିନ ତଳେ ଦଲାଇ ଲାମା ଏକ କାର୍ଯ୍ୟକ୍ରମରେ ଉଦବୋଧନ ଦେଇ ନିଜର ବୟସ ବୃଦ୍ଧି ଏବଂ ପୂର୍ବଜନ୍ମ ବିଷୟରେ କହିଥିଲେ। ଏକ ସାକ୍ଷାତକାର ଅବସରରେ ସେ କହିଥିଲେ ଯେ, ତାଙ୍କର ଆଗାମୀ ଅବତାର ଭାରତରେ ହୋଇପାରେ। ନିଜ ଉତ୍ତରାଧିକାରୀଙ୍କ ବିଷୟରେ ମତ ଦେଇ ଦଲାଇ ଲାମା କହିଥିଲେ ଯେ ସେ ୧୯୫୯ରୁ ବର୍ତ୍ତମାନ ପର୍ଯ୍ୟନ୍ତ ୬୦ ବର୍ଷ ଧରି ଭାରତରେ ନିର୍ବାସିତ ଜୀବନ ବିତାଉଛନ୍ତି। ତେଣୁ ଚୀନ ଦ୍ବାରା ଯଦି ତାଙ୍କ ଉତ୍ତରାଧିକାରୀ ଭାବେ କାହାକୁ ଘୋଷଣା କରାଯାଏ ତା’ହେଲେ ତାଙ୍କୁ ସମ୍ମାନ ନ ଦେବାକୁ ସେ ଘୋଷଣା କରିଥିଲେ।
