୮ଦିନ ମଧ୍ୟରେ ପାଉଁଶ ପରିବହନ ବନ୍ଦ ନହେଲେ ରାସ୍ତାରୋକ ଚେତାବନୀ

ରେଙ୍ଗାଲି: ସମ୍ବଲପୁର ଜିଲା ରେଙ୍ଗାଲି ବ୍ଳକ୍‌‌ କତରବଗା ଗ୍ରାମପଞ୍ଚାୟତ ରଚଦଳିପିଟା, ଝରନପାଲି, ତିଲିଙ୍ଗିକେମ୍ପ, ଭୁଲିଆଟିକ୍ରା, ପିତାପାଲି ଆଦି ଗ୍ରାମ ଦେଇ ବେଆଇନ୍‌‌ ଭାବେ ହେଉଥିବା ପାଉଁଶ ପରିବହନ ଆସନ୍ତା ୮ଦିନ ମଧ୍ୟରେ ବନ୍ଦ କରା ନଗଲେ ସମ୍ବଲପୁର-ଝାରସୁଗୁଡା ରାଜ୍ୟ ରାଜପଥରେ ରାସ୍ତାରୋକ କରାଯିବ। ଏଥିସହ ଜୋରଦାର ଆନ୍ଦୋଳନ କରାଯିବ ବୋଲି ଗ୍ରାମବାସୀଙ୍କ ଏକ ପ୍ରତିନିଧିଦଳ ବୁଧବାର ଜିଲାପାଳଙ୍କୁ ସାକ୍ଷାତ କରି ଜନସାଧାରଣଙ୍କ ସ୍ୱାକ୍ଷରିତ ଦାବିପତ୍ର ପ୍ରଦାନ କରିଛନ୍ତି। ଦାବିପତ୍ରରେ ରେଙ୍ଗାଲି ବିଧାୟକ ନାଉରି ନାୟକଙ୍କ ମଧ୍ୟ ସ୍ୱାକ୍ଷର ରହିଛି। ଜିଲା ପରିଷଦ ସଭ୍ୟ ଦେ ନାରାୟଣ ତିୱାରୀ, ସରପଞ୍ଚ ନିଳାମ୍ବର ରୋହିଦାସ ଏବଂ ବିଭିନ୍ନ ସ୍ୱୟଂ ସହାୟକ ଗୋଷ୍ଠିର କର୍ମକର୍ତ୍ତା ତଥା ସ୍ୱେଚ୍ଛାସେବୀ ଏହି ପ୍ରତିନିଧି ଦଳର ନେତୃତ୍ୱ ନେଇଥିଲେ।

ସୂଚିତ ଯେ, ଅଞ୍ଚଳବାସୀ ଗତ ଏପ୍ରିଲ୍‌‌ ମାସ ୨୪ ତାରିଖ ଦିନ ଜିଲାପାଳଙ୍କୁ ସାକ୍ଷାତ କରି ପାଉଁଶ ପରିବହନ ଯୋଗୁଁ ରାସ୍ତାଘାଟ ଅତି ଶୋଚନୀୟ ହେବା ସହିତ ପ୍ରଦୂଷଣ ସମସ୍ୟା ସୃଷ୍ଟି ହେଉଥିବାରୁ ପାଉଁଶ ପରିବହନ ବନ୍ଦ କରିବା ପାଇଁ ପଦକ୍ଷେପ ନେବାକୁ ଦାବିପତ୍ର ପ୍ରଦାନ କରିଥିଲେ। ଦୀର୍ଘ ୩ ମାସ ବିତିଗଲା ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାନଯିବା ଫଳରେ ସେହି ଗ୍ରାମ ଦେଇ ଅହରହ ଭାରିଯାନରେ ପାଉଁଶ ପରିବହନ ଜାରି ରହିଛି। ରାସ୍ତାଘାଟର ଅବସ୍ଥା ଅତି ଶୋଚନୀୟ ହୋଇ ଲୋକେ ଯାତାୟତରେ ନାହିଁ ନଥିବା ଅସୁବିଧାର ସମ୍ମୁଖିନ ହେଉଛନ୍ତି।

ଉଲ୍ଲେଖଯୋଗ୍ୟ ଯେ, ଗତକାଲି ପାଉଁଁଶ ପରିବହନ ଯୋଗୁଁ ରାସ୍ତା ଅତି ଦୟନୀୟ ହୋଇ କାଦୁଅ ସରସର ହୋଇଥିବାରୁ ଏହାର ପ୍ରତିବାଦ ଏବଂ କାର୍ଯ୍ୟାନୁଷ୍ଠାନ ଦାବୀ କରି ଜିଲା ପରିଷଦ ସଭ୍ୟ ଦେ ନାରାୟଣ ତିୱାରୀ, ସରପଞ୍ଚ ନିଳାମ୍ବର ରୋହିଦାସ ଗ୍ରାମବାସୀଙ୍କ ସହିତ ମିଶି ରାସ୍ତା ଉପରେ ଧାନ ପହ୍ଲା ରୋଇଥିଲେ। ଅଞ୍ଚଳର ୩୦/୪୦ଟି ଗ୍ରାମର ଜନସାଦାରଣ ସ୍କୁଲ କଲେଜ ଛାତ୍ରଛାତ୍ରୀ ଦୈନିନ୍ଦିନ ଏହି ରାସ୍ତାରେ ଯାତାୟତ ପାଇଁ ନିର୍ଭର କରିଥାନ୍ତି।