କଟକ: ଆଜି ହେଉଛି ଚୈତ୍ର ମାସ ଶୁକ୍ଳ ପକ୍ଷ ପ୍ରତିପଦା ତିଥି। ଆଜିର ଏହି ପବିତ୍ର ଦିନରେ ଆରମ୍ଭ ହୋଇଛି ଚୈତ୍ର ନବରାତ୍ର। ଏଥିପାଇଁ ରାଜ୍ୟର ସମସ୍ତ ଶକ୍ତି ପୀଠ ଚଳଚଞ୍ଚଳ ହୋଇଉଠିଛି। ଏହି ନବରାତ୍ରୀରେ ଶକ୍ତିପୀଠରେ ବେଶ ଧୁମଧାମରେ ପୂଜାର୍ଚ୍ଚନା କରାଯାଉଛି। ଏହି ପରିପ୍ରେକ୍ଷୀରେ କଟକର ଅଧିଷ୍ଠାତ୍ରୀ ମା କଟକ ଚଣ୍ଡୀଙ୍କ ପୀଠରେ ସକାଳୁ ରୀତିନୀତି ଅନୁସାରେ ପୂଜାପାଠ କରାଯାଇଛି। ମାଙ୍କ ଦିବ୍ୟ ଦର୍ଶନ କରିବାକୁ ଭକ୍ତଙ୍କ ଭିଡ଼ ଜମିଛି। ଚୈତ୍ର ମଙ୍ଗଳବାରରେ ଉପବାସ କରୁଥିବା ମହିଳାମାନେ ମାଙ୍କଠାରେ ଦୀପ ଜାଳି ମାନସିକ ପୂରଣ ପାଇଁ ପ୍ରାର୍ଥନା କରିଛନ୍ତି।
ଆଜିଠାରୁ ନଅ ଦିନ ପର୍ଯ୍ୟନ୍ତ ମା କଟକ ଚଣ୍ଡୀଙ୍କ ପୀଠରେ ପୂଜା ଚାଲିବ। ଗଡଗଡିଆ ଘାଟରୁ ଘଟ ଆସି ମାଙ୍କ ପ୍ରାଙ୍ଗଣରେ ସ୍ଥାପନା କରାଯିବ। ଏହି ଘଟକୁ ନଅଦିନ ପୂଜା କରାଯିବା ସହିତ ତିନି ଦିନ ଧରି ମାଙ୍କୁ ତ୍ରିଶକ୍ତି ବେଶ କରାଯିବ। ମହାଲକ୍ଷ୍ମୀ, ମହାକାଳୀ ଏବଂ ମହାସରସ୍ୱତୀ ବେଶରେ ସୁସଜ୍ଜିତ କରାଯିବ ବୋଲି ଚଣ୍ଡୀ ମନ୍ଦିରର ମୁଖ୍ୟ ପୂଜକ ମନୋଜ ପଣ୍ଡା ସୂଚନା ଦେଇଛନ୍ତି।
Comments are closed.