ନୂଆଦିଲ୍ଲୀ: ଭାରତରେ କୋଭିଡର ଦ୍ୱିତୀୟ ପର୍ଯ୍ୟାୟ ସଂକ୍ରମଣ ଦ୍ରୁତଗତିରେ ମାଡିଚାଲିଥିବାବେଳେ ବିଭିନ୍ନ ଅଞ୍ଚଳରେ ପୁନଃ ଲକ୍ଡାଉନ ଆରମ୍ଭ ହୋଇଛି। ଦେଶର ବାଣିଜ୍ୟ ରାଜଧାନୀ ଭାବେ ପରିଚିତ ମହାରାଷ୍ଟ୍ର ଏହାଦ୍ୱାରା ସବୁଠାରୁ ଅଧିକ ପ୍ରଭାବିତ ହୋଇଛି। ଏହି କାରଣରୁ ଦେଶର ଅର୍ଥନୈତିକ କାର୍ଯ୍ୟକଳାପ ଏବଂ ଉପଭୋକ୍ତାଙ୍କ ଖର୍ଚ୍ଚ କରିବାର କ୍ଷମତା ଉପରେ ପ୍ରତିକୂଳ ପ୍ରଭାବ ପଡିବା ଆଶଙ୍କା ଦେଖାଦେଇଛି। ଗତବର୍ଷ ତୁଳନାରେ ଚଳିତ ବର୍ଷ ନିର୍ଦ୍ଦିଷ୍ଟ ଅଞ୍ଚଳରେ ଲକ୍ଡାଉନ ଲାଗୁ କରାଯିବା ଏବଂ ଶିଳ୍ପ, କୃଷି ଭଳି କାର୍ଯ୍ୟକୁ ଏଥିରୁ ବାଦ୍ ଦିଆଯିବା ଦ୍ୱାରା ଅର୍ଥନୀତି ଉପରେ ଯେତିକି ପ୍ରତିକୂଳ ପ୍ରଭାବ ପଡିବା କଥା ତାହା କମ୍ ରହିବ ବୋଲି ବିଶ୍ୱସ୍ତରୀୟ ରେଟିଂ ସଂସ୍ଥା ମୁଡିସ୍ ପକ୍ଷରୁ ତାହାର ରିପୋର୍ଟରେ କୁହାଯାଇଛି। ଟିକାକରଣକୁ ବ୍ୟାପକ କରାଯିବା ଦ୍ୱାରା ଭାରତରେ ଦେଖାଦେଇଥିବା କୋଭିଡର ଦ୍ୱିତୀୟ ପର୍ଯ୍ୟାୟ ସଂକ୍ରମଣକୁ ପ୍ରତିହତ କରାଯାଇପାରିବ। ତେବେ ଟିକାର ଅଭାବ ଏହି ପ୍ରୟାସ ପ୍ରତି ବାଧା ଉପୁଜାଇପାରେ ବୋଲି ଏହା ଆଶଙ୍କା କରିଛି।
୨୦୨୧-୨୨ ଆର୍ଥିକ ବର୍ଷରେ ଭାରତର ଅର୍ଥନୈତିକ ଅଭିବୃଦ୍ଧି ୧୩.୭% ହେବା ସମ୍ଭାବନା ରହିଛି ବୋଲି ମୁଡିସ୍ ପକ୍ଷରୁ ତାହାର ଫେବ୍ରୁଆରୀ ରିପୋର୍ଟରେ କୁହାଯାଇଥିଲା। ପ୍ରଥମ ପର୍ଯ୍ୟାୟ କୋଭିଡ ସଂକ୍ରମଣ ପରବର୍ତ୍ତୀ ସମୟରେ ଦେଶରେ ଅର୍ଥନୈତିକ କାର୍ଯ୍ୟକଳାପ ସ୍ୱାଭାବିକ ଅବସ୍ଥାକୁ ଫେରିବା ପରେ ତାହାକୁ ଲକ୍ଷ୍ୟକରି ମୁଡିସ୍ ଏଭଳି ଆକଳନ କରିଥିଲା। ଅନୁରୂପ ଭାବରେ ଚଳିତ ମାସ ପ୍ରଥମ ଭାଗରେ ଆନ୍ତର୍ଜାତିକ ମୁଦ୍ରାପାଣ୍ଠି ଭାରତୀୟ ଅର୍ଥନୀତି ୨୦୨୧-୨୨ ବର୍ଷରେ ୧୨.୫% ଅଭିବୃଦ୍ଧି ହାସଲ କରିବା ନେଇ ଆକଳନ କରିଥିଲା। ଏହା ମଧ୍ୟ କହିଛି ଯେ କୋଭିଡର ଦ୍ୱିତୀୟ ପର୍ଯ୍ୟାୟ ସଂକ୍ରମଣ ପରିପ୍ରେକ୍ଷୀରେ ଏହି ଆକଳନରେ ହ୍ରାସ କରାଯାଇପାରେ।
Comments are closed.