ଦୀପାବଳି ପୂର୍ବରୁ କୋଭିଡ କଟକଣା ଚୁଲିକି ଗଲା; ଦିଲ୍ଲୀ, ଚେନ୍ନଇ ବଜାରରେ ଅସମ୍ଭବ ଭିଡ

ନୂଆଦିଲ୍ଲୀ: କେନ୍ଦ୍ରଠାରୁ ନେଇ ରାଜ୍ୟ ସରକାରଙ୍କ ପର୍ଯ୍ୟନ୍ତ ସମସ୍ତେ କୋଭିଡ ମହାମାରୀକୁ ନେଇ ଚିନ୍ତିତ, ବ୍ୟସ୍ତ ବିବ୍ରତ । ଦେଶରେ କୋଭିଡ-୧୯ କଟକଣାକୁ ଜନସାଧାରଣ ଯେଭଳି ପାଳନ କରିବେ ସେହି ପ୍ରଚାର ବାବଦରେ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ତାହାସହିତ କୋଭିଡରୁ ସୁରକ୍ଷା ଦେବାକୁ ଜନସାଧାରଣଙ୍କ ଟିକାକରଣ ପ୍ରୟାସକୁ ସବୁସ୍ତରରେ ବ୍ୟାପକ କରାଯାଉଛି । କୋଭିଡର ଦ୍ୱିତୀୟ ଲହର ପ୍ରଭାବ କେତେକାଂଶରେ ହ୍ରାସ ପାଇଥିବାବେଳେ ସରକାରଙ୍କ ପକ୍ଷରୁ ଏଥିପାଇଁ ଜାରି କଟକଣାକୁ କୋହଳ କରାଯାଇଛି । ତେବେ ପାର୍ବଣ ସମୟରେ ବଜାର ଘାଟରେ ଭିଡ ନକରିବା, ମାସ୍କ ପିନ୍ଧିବା, ସାମାଜିକ ଦୂରତା ବଜାୟ ରଖିବାକୁ ଜନସାଧାରଣଙ୍କୁ ପ୍ରଧାନମନ୍ତ୍ରୀ ଏବଂ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ, ସ୍ୱାସ୍ଥ୍ୟ ବିଶେଷଜ୍ଞମାନେ ବାରମ୍ବାର ନିବେଦନ କରୁଛନ୍ତି । କିନ୍ତୁ ସେକଥା ଶୁଣିବାକୁ କେହିନାହିଁ । ଦୀପାବଳି ପୂର୍ବରୁ ନୂଆଦିଲ୍ଲୀ, ମଧ୍ୟପ୍ରଦେଶର ଭୋପାଳ, ତାମିଲନାଡୁର ଚେନ୍ନଇ ଆଦି ସହରରେ ରବିବାର ଯେଉଁଭଳି ଭାବରେ ଭିଡ ହୋଇଥିଲା, ତାହା ଦେଖିଲେ ଜନସାଧାରଣ କିଭଳି ବେପରୁଆ ହୋଇଯାଇଛନ୍ତି ତାହା ସ୍ପଷ୍ଟ ଜଣାପଡୁଥିଲା । ଦେହରେ ଦେହ ଘଷିହୋଇ ବଜାରରେ ଲୋକମାନେ ଦୀପାବଳି ପାଇଁ କିଣାକିଣି କରୁଥିଲେ । ସାମାଜିକ ଦୂରତା ତ ଦୂରର କଥା, ସଂଖ୍ୟାଧିକ ଲୋକଙ୍କ ମୁହଁରେ ମାସ୍କ ମଧ୍ୟ ନଥିଲା । ଦିଲ୍ଲୀର ସଦର ବଜାର, ଚାନ୍ଦନି ଚୌକ, ଲଜପତ ନଗର, ଲାଲ କ୍ୱାର୍ଟର କୃଷ୍ଣ ନଗର, କରୋଲ ବାଗ, କମଳା ନଗର, ରାଜୌରୀ ଗାର୍ଡେନ ଏବଂ ତିଲକ ନଗର ଆଦି ବଜାରରେ ରବିବାର ଅସମ୍ଭବ ଭିଡ ଲାଗିଥିଲା । କହିବାକୁ ଗଲେ ବଜାରରେ ଦଳାଚକଟା ପରିସ୍ଥିତି ସୃଷ୍ଟି ହୋଇଥିଲା ବୋଲି ଦିଲ୍ଲୀ ସଦର ବଜାର ମାର୍କେଟ ଆସୋସିଏସନ ସଭାପତି ଦେବରାଜ ବାୱେଜା କହିଛନ୍ତି । ଦୀପାବଳି ପୂର୍ବରୁ ରବିବାର ବିପୁଳ ସଂଖ୍ୟକ ଲୋକ ବଜାରକୁ ଆସିବା ଆଶା କରାଯାଉଥିବାବେଳେ ଏଥିପାଇଁ ସରକାରଙ୍କ ପକ୍ଷରୁ କୌଣସି ବ୍ୟାପକ ବନ୍ଦୋବସ୍ତ କରାଯାଇନଥିବା ସେ କହିଛନ୍ତି । ଏପରିକି କାହା ମୁହଁରେ ମାସ୍କ ନଥିବା ସେ କହିଛନ୍ତି ।