ନୂଆଦିଲ୍ଲୀ: ଖାଇବା ତେଲ ଉପରେ ଗ୍ରାହକଙ୍କୁ ମିଳିବ ଆସ୍ୱସ୍ତି । ସୋମବାର ଏନେଇ ଏସଇଏ ଏକ ସୂଚନା ଦେଇଛି । ଏସଇଏର କହିବା ଅନୁଯାୟୀ ଖାଇବା ତେଲ କମ୍ପାନୀଗୁଡ଼ିକ ଗ୍ରାହକଙ୍କୁ ଆସ୍ୱସ୍ତି ଦେଇଛନ୍ତି । କମ୍ପାନୀଗୁଡ଼ିକ ତେଲର ଦାମ୍ ୧୦ରୁ ୧୫ % ହ୍ରାସ କରିଛନ୍ତି । ଏହି କମ୍ପାନୀ ଗୁଡ଼ିକ ମଧ୍ୟରେ ରୁଚି ସୋୟା ଓ ଆଦାନୀ ୱିଲମାର ମଧ୍ୟ ସାମିଲ ଅଛନ୍ତି । ଯାହା ଦ୍ୱାରା ଗ୍ରାହକମାନେ ଉପକୃତ ହେବେ ।
ବିଭିନ୍ନ ତେଲ କମ୍ପାନୀ ତଥା ଆଦାନୀ ୱିଲମାର ଏହାର ଫର୍ଚ୍ୟୁନ୍ ବ୍ରାଣ୍ଡ, ରୁଚି ଗୋଲ୍ଡ ଏବଂ ନଟ୍ରେଲା ବ୍ରାଣ୍ଡ, ସନ୍ରିଚ୍, ରୁଚି ସୋୟା, ଫ୍ରିଡମ୍, ସୂର୍ୟ୍ୟମୁଖୀ ଭଳି ଅନେକ ତେଲ କମ୍ପାନୀ ତାଙ୍କର ଏମଆରପି ହ୍ରାସ କରିଛନ୍ତି । ସେହିଭଳି, କୋଫକୋ ନ୍ୟୁଟ୍ରିଲାଇଭ୍ ବ୍ରାଣ୍ଡ, ଫ୍ରିଗୋରିଫିକେ ଆଲାନା ସନି ବ୍ରାଣ୍ଡ, ଗୋକୁଲ ଆଗ୍ରୋ ଭିଟାଲାଇଫ୍, ମେହାକ୍ ଏବଂ ଜ୍ୟାକା ବ୍ରାଣ୍ଡର ମୂଲ୍ୟ ହ୍ରାସ କରାଯାଇଛି ।
ଏସଇଏ ସୋମବାର ଦିନ ତାର ବିବୃତିରେ କହିଛି, ତେଲ କମ୍ପାନୀ ଗୁଡ଼ିକ ମୂଲ୍ୟ ହ୍ରାସ କରିଛନ୍ତି । ଯାହା ଜନସାଧାରଣଙ୍କୁ ଲାଭଦାୟକ ହେବ । ଏହାସହ ସରକାର ମଧ୍ୟ ନିକଟରେ ଆମଦାନୀ ଶୁଳ୍କ ହ୍ରାସ କରିଥିଲେ । କେନ୍ଦ୍ର ସରକାରଙ୍କ ଖାଦ୍ୟ ସଚିବ ସୁଧାଂଶୁ ପାଣ୍ଡେୟ ଏନେଇ ତୈଳ ଶିଳ୍ପ ପ୍ରତିନିଧିଙ୍କ ସହ ଆଲୋଚନା କରିଥିଲେ । ବୈଠକରେ ଆମଦାନୀ ଶୁଳ୍କ ହ୍ରାସ ସହ ଜନସାଧାରଣଙ୍କୁ ଖାଇବା ତେଲ ଉପରେ କିପରି ରିହାତି ଦିଆଯାଇପାରିବ ସେ ନେଇ ଆଲୋଚନା କରିଥିଲେ ।
ମୂଲ୍ୟକୁ ନିୟନ୍ତ୍ରଣ କରିବା ପାଇଁ ସରକାର ଚଳିତ ବର୍ଷ ଉଭୟ ବିଶୋଧିତ ଏବଂ ଅଶୋଧିତ ଖାଇବା ତେଲ ଉପରେ ଆମଦାନୀ ଶୁଳ୍କ ହ୍ରାସ କରିଛନ୍ତି। ଶେଷ ଆମଦାନୀ ଶୁଳ୍କ ଡିସେମ୍ବର ୨୦ ରେ ହ୍ରାସ କରାଯାଇଥିଲା । ବିଶୋଧିତ ତେଲ ଉପରେ କଷ୍ଟମ୍ସ ଶୁଳ୍କ ୧୭.୫ ପ୍ରତିଶତରୁ ୧୨.୫ ପ୍ରତିଶତକୁ ହ୍ରାସ କରାଯାଇଥିଲା ।
