ଫୁଲବାଣୀ : ଗତ ତିନି/ଚାରି ଦିନ ହେଲା ଫୁଲବାଣୀରେ ରାତିରେ ପ୍ରବଳ ଥଣ୍ଡା ଅନୁଭୂତ ହେଉଛି। ମନେ ହେଉଛି, ସତେ ଯେମିତି ଶୀତ ଋତୁ ଫେରି ଆସିଛି। କିଛି ଦିନ ଧରି ଗରମ ହେବା ପରେ ଏବେ ଏଭଳି ପାଣିପାଗ ଲୋକଙ୍କୁ ଅଡ଼ୁଆରେ ପକାଇଛି। ଦିନ ଓ ରାତି ତାପମାତ୍ରା ଭିତରେ ପ୍ରାୟ ୧୫ ଡିଗ୍ରୀ ଫରକ ରହୁଛି। ଗତ ତିନି ଦିନ ହେଲା ରାତି ତାପମାତ୍ରା ହ୍ରାସ ପାଇବାରେ ଲାଗିଛି। ଏହାର ପ୍ରଭାବରେ ଅନୁଭୂତ ହେଉଛି ପ୍ରବଳ ଥଣ୍ଡା। ଗ୍ରୀଷ୍ମର ଆଗମନ ଦେଖି ଲୋକେ ପେଡିରେ ପୂରାଇ ଦେଇଥିବା ଶୀତବସ୍ତ୍ର ପୁଣିଥରେ ବାହାର କରିବାକୁ ବାଧ୍ୟ ହୋଇଛନ୍ତି। ପାଣିପାଗ ବିଭାଗର ସୂଚନା ଅନୁସାରେ, ବୁଧବାର ଫୁଲବାଣୀ ଠାରେ ସର୍ବନିମ୍ନ ତାପମାତ୍ରା ୧୪.୫ ଡିଗ୍ରୀ ରହିଥିଲା। ଶୁକ୍ରବାର ଏହା ତଳକୁ ଖସି ୯ ଡିଗ୍ରୀ ରେକର୍ଡ କରାଯାଇଛି। ଆଜି ପାଇଁ ଏହା ରାଜ୍ୟର ସର୍ବନିମ୍ନ ତାପମାତ୍ରା ରହିଛି। ଏପଟେ ସର୍ବାଧିକ ତାପମାତ୍ରା ବୁଧବାର ୩୬.୫ ଥିବା ବେଳେ ଗୁରୁବାର ୩୨.୫ ଓ ଶୁକ୍ରବାର ୩୨.୨ ଡିଗ୍ରୀ ରହିଛି। ଶୁକ୍ରବାର ଦିନ ଓ ରାତି ତାପମାତ୍ରା ଭିତରେ ୨୩ ଡିଗ୍ରୀର ତଫାତ ରହିଛି। ଏହା ସହିତ ଖାପ ଖୁଆଇବା ଏକ ସମସ୍ୟା ହୋଇଛି। ଜି ଉଦୟଗିରିରେ ଆଜି ସର୍ବାଧିକ ତାପମାତ୍ରା ୩୧.୬ ଥିବା ବେଳେ ଦାରିଙ୍ଗବାଡିରେ ୩୨ ଡିଗ୍ରୀ ରେକର୍ଡ କରାଯାଇଛି। ଅପରପକ୍ଷେ, ଜିଲ୍ଲାର କିଛି ସ୍ଥାନରେ ସକାଳୁଆ କୁହୁଡି ମଧ୍ୟ ଦେଖିବାକୁ ମିଳୁଛି। ଏଭଳି ପାଣିପାଗ ଆଉ କିଛି ଦିନ ରହିବ ବୋଲି କୁହାଯାଉଛି। ମୋଟାମୋଟି ଭାବେ ଏବେ କନ୍ଧମାଳ ଜିଲ୍ଲାରେ ଉଭୟ ଶୀତ ଓ ଗ୍ରୀଷ୍ମ ଋତୁର ଅନୁଭବ ମିଳୁଛି।
Comments are closed.