ନର୍ଲା: କଳାହାଣ୍ଡି ଜିଲା କଂଗ୍ରେସର ଟାଣୁଆ ଯୁବନେତା, ପୂର୍ବତନ ଉପ-ନଗରପାଳ ତଥା ବରିଷ୍ଠ ଆଇନଜୀବୀ ଚିତ୍ତରଞ୍ଜନ ମଣ୍ଡଳ(ବାବୁଲି) ଗୁରୁବାର ବିଜେଡ଼ିରେ ସାମିଲ ହୋଇଛନ୍ତି। ଚଳିତ ନିର୍ବାଚନରେ ନର୍ଲା ନିର୍ବାଚନ ମଣ୍ଡଳୀରୁ କଂଗ୍ରେସ ବିଧାୟକ ପ୍ରାର୍ଥି ହୋଇ ପରାଜିତ ହେବା ପରେ ନିକଟରେ ସେ ଦଳରୁ ଇସ୍ତଫା ଦେଇଥିଲେ। ରାଜ୍ୟ ଶକ୍ତିମନ୍ତ୍ରୀ ତଥା ଜୁନାଗଡ଼ ବିଧାୟକ କ୍ୟାପ୍ଟେନ ଦିବ୍ୟଶଙ୍କର ମିଶ୍ର, ପୂର୍ବତନ ମନ୍ତ୍ରୀ ପୁଷ୍ପେନ୍ଦ୍ର ସିଂହଦେଓ, ବିଧାୟକ ମୌସଧୀ ବାଗ୍, ପ୍ରଦୀପ ଦିଶାରୀ, ପ୍ରବୋଧ ରଥ, ଜିଲା ସାଧାରଣ ସଂପାଦକ ଭବାନୀଶଙ୍କର ନିଆଲ, ଜିତେନ୍ଦ୍ର ମହାନ୍ତି, ଅନାମ ନାଏକ, ଦୁଷ୍ମନ୍ତ ନାଏକ, ଗୋବର୍ଦ୍ଧନ ଦାଶ, ଧବଳେଶ୍ୱର ମହାପାତ୍ର, ପ୍ରଦୀପ ମୁଣ୍ଡ, ସଚ୍ଚିନ ଜୈନ, ଅବିନାଶ ଠାକୁରଙ୍କ ସମେତ ଶତାଧିକ ସମର୍ଥକଙ୍କ ଗହଣରେ ବିଜେଡ଼ି ସୁପ୍ରିମୋ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ନବୀନ ନିବାସରେ ସେ ବିଜେଡ଼ିରେ ସାମିଲ ହୋଇଛନ୍ତି। କଳାହାଣ୍ଡି ବିଜେଡି ମହଲରେ ଶ୍ରୀ ମଣ୍ଡଳଙ୍କୁ ସ୍ୱାଗତ କରାଯାଇଛିା
୩୦ ବର୍ଷରୁ ଊର୍ଦ୍ଧ୍ଵ ସମୟ ଧରି ସାଧାରଣ ଜନତାଙ୍କ ସେବା କରିଥିବା ଶ୍ରୀ ମଣ୍ଡଳ କଂଗ୍ରେସର ବିଶୃଙ୍ଖଳିତ ଆଚରଣ ପାଇଁ ଦଳ ଛାଡି ଥିବା କହିଥିଲେ। ଦଳରେ ଥିବା କଂଗ୍ରେସ ବିରୋଧିଙ୍କ ଉପରେ କାର୍ଯ୍ୟାନୁଷ୍ଠାନ ନେବାକୁ ଦାବି କରି ଶ୍ରୀମଣ୍ଡଳ ଦଳକୁ ଲିଖିତ ଭାବେ ଜଣାଇଥିଲେ ହେଁ ଓଲଟା ସେମାନଙ୍କୁ ପ୍ରୋତ୍ସାହନ ଦିଆଯାଉଥିବା ଶ୍ରୀ ମଣ୍ଡଳ କହିଥିଲେ।
ସୂଚନାଯୋଗ୍ୟ, ଶ୍ରୀ ମଣ୍ଡଳ କଳାହାଣ୍ଡି ଜିଲା ଭବାନୀପାଟଣା ପୌରପାଳିକାରେ ୨୦୦୩ ରୁ ୨୦୧୯ ଯାଏଁ ତିନିଥର ଲଗାତାର କାଉନସିଲର ଓ ୨୦୦୮ରୁ ୨୦୧୩ ଯାଏଁ ଭାବନୀପାଟଣା ଉପ-ନଗରପାଳ ଦାୟିତ୍ୱ ତୁଲାଇଥିଲେ।
