ଡେରାଡୁନ୍: ଦୀର୍ଘ ଦୁଇ ବର୍ଷ ବ୍ୟବଧାନରେ ଆରମ୍ଭ ହୋଇଥିବା ଚାରିଧାମ୍ ଯାତ୍ରା ବିପଜ୍ଜନକ ରହିଛି। ଯାତ୍ରାର ମାତ୍ର ୬ ଦିନରେ ୨୦ ଶ୍ରଦ୍ଧାଳୁଙ୍କର ମୃତ୍ୟୁ ହୋଇଥିବା ଉତ୍ତରାଖଣ୍ଡ ସରକାରଙ୍କ ପକ୍ଷରୁ କୁହାଯାଇଛି। ଏତେ ସଂଖ୍ୟାରେ ଶ୍ରଦ୍ଧାଳୁଙ୍କ ମୃତ୍ୟୁ ପୂର୍ବରୁ କେବେ ଘଟି ନ ଥିଲା। ଚଳିତ ମାସ ୩ରେ ଗଙ୍ଗୋତ୍ରୀ ଓ ଯମୁନେତ୍ରୀକୁ ଯାତ୍ରା ଆରମ୍ଭ ହୋଇଥିବାବେଳେ ୬ରେ କେଦାରନାଥ ଓ ୮ରେ ବଦ୍ରିନାଥ ଯାତ୍ରା ଆରମ୍ଭ ହୋଇଛି। ଗଙ୍ଗୋତ୍ରୀ ଓ ଯମୁନେତ୍ରୀରେ ୧୪ଜଣଙ୍କ ପ୍ରାଣହାନି ଘଟିଥିବାବେଳେ କେଦାରନାଥ ଯାତ୍ରାରେ ୫ ଓ ବଦ୍ରିନାଥରେ ଜଣଙ୍କର ମୃତ୍ୟୁ ଘଟିଛି।
ଅଧିକାଂଶଙ୍କର ଶ୍ବାସପ୍ରଶ୍ବାସ ସମସ୍ୟା ଓ ହୃଦ୍ଘାତରେ ମୃତ୍ୟୁ ହୋଇଥିବା ରାଜ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି। ପ୍ରାୟ ୧୨ହଜାର ଫୁଟ ଉଚ୍ଚ ପାର୍ବତ୍ୟାଞ୍ଚଳରେ ଅମ୍ଳଜାନ କମ୍ ଯୋଗୁଁ ଏଭଳି ଘଟିଥିବା ପ୍ରକାଶ। ଯାତ୍ରୀମାନଙ୍କୁ ଟିକିନିଖି ସ୍ବାସ୍ଥ୍ୟ ପରୀକ୍ଷା ପରେ ଯାତ୍ରା ଅନୁମତି ମିଳୁଥିଲେ ମଧ୍ୟ ଏଭଳି ଦୁର୍ଘଟଣାକୁ ଏଡ଼ାଇଯିବା ସମ୍ଭବ ହୋଇ ନ ଥିବା ସ୍ବାସ୍ଥ୍ୟ ବିଭାଗ ଅଧିକାରୀ କହିଛନ୍ତି।
