ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ପକ୍ଷରୁ ପୋଷଣ ମାସ ଓ ମା’ ପାଇଁ ଗଛଟିଏ କାର୍ଯ୍ୟକ୍ରମ ପାଳିତ

ଡେସ୍କ: କେନ୍ଦ୍ର ସରକାରଙ୍କ ସୂଚନା ଓ ପ୍ରସାରଣ ମନ୍ତ୍ରଣାଳୟ ଅଧିନସ୍ଥ, ଜୟପୁର କ୍ଷେତ୍ରୀୟ କାର୍ଯ୍ୟାଳୟ ପକ୍ଷରୁ ପୋଷଣ ମାସ ଏବଂ ମା’ ପାଇଁ ଗଛଟିଏ ଶୀର୍ଷକ ବିଷୟ ଉପରେ ଏକ ସଚେତନତା କାର୍ଯ୍ୟକ୍ରମ କୁନ୍ଦୁରା ବ୍ଲକର ବାଗଦେରୀ ଗ୍ରାମ ପଂଚାୟତ କଲ୍ୟାଣ ମଣ୍ଡପରେ ଆଜି ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବ୍ଲକ ଅଧ୍ୟକ୍ଷା ରାଜେଶ୍ୱରୀ ପରଜା ଯୋଗ ଦେଇଥିବା ବେଳେ ଅନ୍ୟ ମାନଙ୍କ ମଧ୍ୟରେ ବ୍ଲକ ଉପାଧ୍ୟକ୍ଷ ତରଣୀସେନ ବିଶୋଇ, ସ୍ଥାନୀୟ ସରପଞ୍ଚ ମାନସୀ ସାଆନ୍ତା ପ୍ରମୁଖ ଅତିଥି ଭାବେ ମଞ୍ଚାସିନ ଥିଲେ। କାର୍ଯ୍ୟକ୍ରମରେ କୁନ୍ଦୁରା ସିଡିପିଓ ଆରତୀ ମହାପାତ୍ର, ଡଃ ଦେବାଶିଷ ମହାରଣା, ଡଃ ହରିଶ ଚନ୍ଦ୍ର ପ୍ରଧାନ ଓ ଡେପୁଟି ରେଞ୍ଜର ଛବିନ୍ଦ୍ର ରନ୍ଧାରୀ ପ୍ରମୁଖ ଯୋଗ ଦେଇ ବିସ୍ତୃତ ଭାବେ ପୋଷଣର ଉପକାରିତା ଏବଂ ଏହା ସମସ୍ତଙ୍କ ଲାଗି କାହିଁକି ଆବଶ୍ୟକ ଓ ପରିବେଶ ସୁରକ୍ଷା ନିମନ୍ତେ ଗଛର ଉପାଦେୟତା କିଭଳି ଗୁରୁତ୍ୱପୂର୍ଣ, ସେ ସମ୍ପର୍କରେ ଆଲୋଚନା କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସ୍ଲୋଗାନ ମା’ ପାଇଁ ଗଛଟିଏ ବର୍ତମାନ କିଭଳି ପ୍ରଯୁଜ୍ୟ ସେ ସମ୍ପର୍କରେ ଉପସ୍ଥିତ ମହିଳା ଓ ବିଦ୍ୟାଳୟର ଛାତ୍ରଛାତ୍ରୀ ତଥା ଗ୍ରାମବାସୀଙ୍କୁ ସଚେତନ କରାଇଥିଲେ। କାର୍ଯ୍ୟକ୍ରମରେ ଛାତ୍ରଛାତ୍ରୀଙ୍କୁ ସଚେତନ କରିବା ସକାଶେ ବିଭିନ୍ନ ପ୍ରତିଯୋଗିତାମାନ ଆୟୋଜିତ ହେବା ସହ ଏକ ସଚେତନତା ପଦ ଯାତ୍ରା ଓ ପଥପ୍ରାନ୍ତ ନାଟକ ମଧ୍ୟ ଆୟୋଜନ କରାଯାଇଥିଲା।