ବୁର୍ଲା: ଛତିଶଗଡ଼ରୁ ପର୍ଯ୍ୟଟକଙ୍କୁ ନେଇ ହିରାକୁଦ ବନ୍ଧ ବୁଲିବାକୁ ଆସିଥିବା ବସ୍ ବୁର୍ଲା ପ୍ଲାନେଟୋରିୟମ ନିକଟରେ ଅଚଳ ହୋଇଯାଇଥିବା ବେଳେ ରାତ୍ରି ରହଣୀ ପାଇଁ ପର୍ଯ୍ୟଟକଙ୍କୁ ସହାୟତା କରିଛନ୍ତି ବିଜେଡି କର୍ମୀ। ଏପଟେ ବସ୍ ଅଚଳକୁ ସେପଟେ ରାତି ହୋଇଯାଇଥିବାରୁ ଚିନ୍ତାରେ ପଡ଼ିଯାଇଥିଲେ ବସ୍ରେ ଥିବା ଯାତ୍ରୀ। ଏହି ଘଟଣା ସମ୍ପର୍କରେ ସୂଚନା ପାଇବା ପରେ ତୁରନ୍ତ ବୁର୍ଲା ବିଜେଡି କର୍ମୀମାନେ ସହାୟତାର ହାତ ବଢ଼ାଇଥିଲେ। ଘଟଣା ସମ୍ପର୍କରେ ଏସଏମସି ଏବଂ ସ୍ଥାନୀୟ ପୁଲିସର ସହାୟତାରେ ବସ୍ରେ ଥିବା ୪୩ଜଣ ଯାତ୍ରୀଙ୍କୁ ରାତ୍ରିଯାପନର ବ୍ୟବସ୍ଥା କରିଥିଲେ। ବସ୍ରେ ଛତିଶଗଡ଼ ରାଜ୍ୟ ସାରଙ୍ଗଗଡ଼ ଜିଲା ମାଲଦା ଥାନା ଅଞ୍ଚଳର ୨୦ଜଣ ପୁରୁଷ, ୧୫ଜଣ ମହିଳା ଏବଂ ୮ଜଣ ଶିଶୁ ରହିଥିବା ଜଣାପଡ଼ିଛି। ତେବେ ସମସ୍ତଙ୍କୁ ବୁର୍ଲା ୩ ନମ୍ବର ୱାର୍ଡ ଅଫିସ ସମେତ ନେତାଜୀ ଛକ ନିକଟରେ ଥିବା ଏସଏମସିର ବିଶ୍ରାମଗାରରେ ସମସ୍ତଙ୍କୁ ଆଶ୍ରୟ ପାଇଁ ବ୍ୟବସ୍ଥା କରାଯାଇଛି। ସୂଚନା ଥାଉକି, ଏହି ପର୍ଯ୍ୟଟକମାନେ ପୁରୀ ଜଗନ୍ନାଥ ଦର୍ଶନ ପାଇଁ ଯାଇଥିଲେ। ସେଠାରୁ ଫେରିବା ପରେ ହିରାକୁଦ ବୁଲିବା ପରେ ନିଜ ଘରକୁ ଯିବାର କାର୍ଯ୍ୟକ୍ରମ ରହିଥିଲା।
Comments are closed.