ସମାଜ ଡିଜିଟାଲ ଡେସ୍କ: ପଞ୍ଜାବରେ ପୁଲିସ ଉପରକୁ ହୋଇଥିବା ଗ୍ରେନେଡ ଆକ୍ରମଣର ମାଷ୍ଟରମାଇଣ୍ଡ ହେଉଛି ବ୍ରିଟିଶ ସେନାର ଜଣେ ସୈନିକ। ପୁଲିସ ଅଭିଯୁକ୍ତ ସୈନିକ ଜଗଜିତ ସିଂହ ନାଁରେ ମାମଲା ଦାୟର କରିଛି। ଗତ ଡିସେମ୍ବର ୧୯ ଏବଂ ୨୨ ତାରିଖରେ କଲନୌର ଥାନାରେ ରୁଜୁ ହୋଇଥିବା ଦୁଇଟି ଏତଲାରେ ତା’ର ନାଁ ରହିଛି। ୟୁଏପିଏ(ଅନଲଫୁଲ୍ ପ୍ରିଭେନସନ ଆକ୍ଟ) ଅଧୀନରେ ତା’ ନାଁରେ ମାମଲା ରୁଜୁ ହୋଇଛି।
ସୂଚନା ଅନୁସାରେ, ଗତ ଡିସେମ୍ବର ମାସରେ ଗୁରଦାସପୁର ଜିଲାରେ ପୁଲିସ ଫାଣ୍ଡି ଉପରେ ଗ୍ରେନେଡ ଆକ୍ରମଣ ହୋଇଥିଲା। ୩ ଜଣ ଯୁବକ ଗୁରବିନ୍ଦର ସିଂହ, ବିରେନ୍ଦ୍ର ସିଂ ଏବଂ ଜସନପ୍ରୀତ ସିଂହ ଏହି ଗ୍ରେନେଡ ଆକ୍ରମଣ କରିଥିଲେ। ପରବର୍ତ୍ତୀ ସମୟରେ ଅଭିଯୁକ୍ତମାନେ ପିଲିଭିତଠାରେ ପୁଲିସ ଏନକାଉଣ୍ଟରରେ ନିହତ ହୋଇଥିଲେ। ସେମାନେ ଖଲିସ୍ତାନୀ ଆତଙ୍କବାଦୀ ବୋଲି ସନ୍ଦେହ କରାଯାଉଥିଲା। ଜାଲ ପରିଚୟପତ୍ର ଦାଖଲ କରି ସେମାନେ ହୋଟେଲରେ ରହିବା ସହିତ ଏହି ଆକ୍ରମଣ ଯୋଜନା କରିଥିଲେ। ଏସବୁର ମାଷ୍ଟରମାଇଣ୍ଡ ଥିଲା ୩୭ ବର୍ଷୀୟ ଜଗଜିତ। ଛଦ୍ମନାମ ଫତେ ସିଂହ ବାଘୀ ନାଁରେ ସେ ନିଜ ପରିଚୟ ପ୍ରକାଶ କରୁଥିଲା। ପାକିସ୍ତାନୀ ସଂଗଠନ ଖଲିସ୍ତାନ ଜିନ୍ଦାବାଦ ଫୋର୍ସ(କେଜେଡଏଫ) ଏବଂ ଏହାର ମୁଖ୍ୟ ରଞ୍ଜିତ ସିଂହ ନୀତାଙ୍କ ସହିତ ଜଗଜିତର ସମ୍ପର୍କ ଥିବା ଜଣାପଡ଼ିଛି। ପଞ୍ଜାବ ପୁଲିସ ସ୍ବରାଷ୍ଟ ମନ୍ତ୍ରଣାଳୟ ଏବଂ ବୈଦେଶିକ ମନ୍ତ୍ରଣାଳୟ ସହିତ ଯୋଗାଯୋଗ କରିଛି। ଜଗଜିତ ନାମରେ ରେଡ କର୍ଣ୍ଣର ନୋଟିସ ଜାରି କରିବା ଲାଗି ଭାରତ ପକ୍ଷରୁ ବ୍ରିଟେନ ସରକାରଙ୍କ ସହିତ ଆଲୋଚନା ପାଇଁ ଉଦ୍ୟମ ଚାଲିଥିବା କୁହାଯାଇଛି।
