ଲକ୍ଷ୍ନୌ: ଲକ୍ଷ୍ନୌରେ ବିଶ୍ୱର ସବୁଠାରୁ ବିଧ୍ୱଂସକାରୀ ସୁପରସୋନିକ୍ କ୍ରୁଜ୍ ମିଶାଇଲ୍ ବ୍ରହ୍ମୋସ୍ର ଉତ୍ପାଦନ ୟୁନିଟ୍ ଉଦ୍ଘାଟିତ ହୋଇଛି। ରବିବାର ଦିଲ୍ଲୀରୁ ଭିଡିଓ କନଫରେନ୍ସିଂ ଜରିଆରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏହାକୁ ଉଦ୍ଘାଟନ କରିଛନ୍ତି। ଲକ୍ଷ୍ନୌରେ ଉଦ୍ଘାଟନୀ କାର୍ଯ୍ୟକ୍ରମରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉପସ୍ଥିତ ଥିଲେ।
ଲକ୍ଷ୍ନୌରେ ପ୍ରତିଷ୍ଠିତ ବ୍ରହ୍ମୋସ୍ ଉତ୍ପାଦନ ୟୁନିଟ୍ ୩୦୦ କୋଟି ଟଙ୍କା ଖର୍ଚ୍ଚରେ ନିର୍ମିତ ହୋଇଛି। ଏଥିପାଇଁ ରାଜ୍ୟ ସରକାର ମାଗଣାରେ ୮୦ ହେକ୍ଟର ଜମି ଯୋଗାଇ ଦେଇଛନ୍ତି। ଏହାର ନିର୍ମାଣ କାର୍ଯ୍ୟ ମାତ୍ର ସାଢ଼େ ତିନି ବର୍ଷ ମଧ୍ୟରେ ସମାପ୍ତ ହୋଇଛି। ବ୍ରହ୍ମୋସ ମିଶାଇଲ୍ ଭାରତ ଏବଂ ରୁଷର ମିଳିତ ଉଦ୍ୟମର ଫଳାଫଳ। ଏହି କ୍ଷେପଣାସ୍ତ୍ରକୁ ସ୍ଥଳ, ଆକାଶ ଏବଂ ସମୁଦ୍ରରୁ ନିକ୍ଷେପ କରାଯାଇପାରିବ।
